撐小店！白手起家的地道糖水店 |土瓜灣有咩好食|
廣告
老區土瓜灣，市井得來有點混亂，林立的舊樓，隱藏很多心機小店，以及一個個獅子山故事，甘露甜品的事頭婆蘭姐就是其中之一。36年前，年僅廿歲的中山少女，心口 掛個勇字，用五千蚊偷渡來港，跟叔公在九龍城推車仔，日穿數百串魚蛋魷魚，朝七晚十一，密密做，唔怕辛苦，夢想有一天能夠擁有自己舖頭。日曬雨淋幾年，儲到兩萬八，押下全副身家，在土瓜灣頂了一間涼茶小店，開始賣糖水。開檔時，手緊得要典當僅有的一枚戒指，套現幾百蚊來買碗筷枱椅。沒有人比蘭姐更明白窮的滋味，再艱難，一咬牙，還是捱過。
日做夜做，無時間識男仔。經親戚介紹，識到做廚的老公。蘭姐並不港女，無車無樓都不相干，只求勤力踏實，而且要是同行。「合桃糊同芝麻糊都識咗我老公先有得賣，嫁個做飲食業的就有呢度好，起碼啱傾先！」事實證明，蘭姐沒有錯，兩公婆胼手胝足，一起將甘露甜品做旺。八、九十年代，土瓜灣很熱鬧，近機場、又有工廠大廈，適逢經濟起飛，加班後宵夜的人絡繹不絕，淨賣糖水，生意多得一雙手做不完。蘭姐總共生 了5個孩子，陀仔煮飯教功課打仔，通通都在這間幾百呎舖頭仔發生，每天忙忙亂亂做足十幾個鐘，辛苦卻很充實。一直到97金融風暴，人人愁眉苦面，不想食糖水。蘭姐就重操故業，加賣魚蛋魷魚豬皮，當年做小販跟過老師傅學做獨門沙嗲醬的功夫又派用場，鹹 點一出，生意果然回升。
三十年眨眼過去，兒女已經出身，舖位又是早年買下，生活無憂。蘭姐無暇回首前塵，反而更懂得欣賞眼前的工作。「老公每朝十點就落舖煲糖水，炒芝麻、炸合桃，又要整豆腐花。我就瞓到中午，施施然下來開門做生意。之後，老公回去休息，我就一夫當關。日日如是，同街坊傾吓偈，開開心心又一日。」富足，從不等於大富大貴；能夠活在 當下，生活感恩，就是最大的幸福。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
