去九龍城食川港風味名菜@Dining娜

啲friend話想食火鍋，去九龍城唔使煩，大把選擇可以慢慢揀！不過我Dining娜梗係唔會是是但但啦！Well～如果你食得辣，又like雞煲，就要試下橋頭水煮魚火鍋雞煲！

呢間舖頭嘅總廚榮師傅，唔單止喺四川做過廚師，仲喺雞煲比賽攞過獎，真係不得了！佢出品嘅雞煲用指天椒、秘製重慶雞煲醬同8款香料炮製而成，有四川風味之餘，仲減油、減鹹，就算要keep fit都唔使就住食。

至於舖名提及嘅鎮店水煮魚，唔用鯇魚，用桂花魚，真係每食一啖都wow出聲，啖啖肉，仲有鮮魚香，perfect池！其他地道四川小菜都唔好錯過，可以自己揀辛辣度，超級辣、大中小辣、BB辣，甚至走辣都得，咩人都啱食呀！

必食四川名菜

橋頭酸菜桂花魚 $288
健脾開胃嘅四川名菜，同樣改用桂花魚，酸味遇上微辣好醒胃，少油少鹽食起嚟更健康。

正宗重慶水煮桂花魚 $288
選用多肉少骨嘅石斑級桂花魚，以四川古法炮製，但減少辣油分量，啱晒鍾意食辣嘅朋友。

惹味 VS 清潤之選

秘製重慶雞煲 $238/全隻
改良原有嘅四川做法：減油、減鹹，雞件即叫即炒，麻味比辛辣味略重，好惹味。

麻辣枝竹牛筋腩煲 $168
將四川風味結合潮式做法，重慶雞煲同滷水風味並重，換上牛筋腩做主角，比用雞件更入味。

澳門海鮮豬骨鍋底 $198
以巴西豬骨筒熬製，再配合中蝦、元貝、蜆等時令海鮮，再加粟米、枝竹等放湯，味道清甜，入喉舒服。

橋頭自家香口美食

橋頭香辣蟹 $228
以肉蟹混入指天椒、香蒜等炒製，咬落啖啖肉，香辣味道啱啱好，唔會搶走鮮甜味。

金沙一口鮑 $168
選用鮑味較重嘅麻鮑仔，蘸滿蛋黃金沙醬炸至香口，邊食邊飲啤酒一流。

沙薑豬粉腸 $68
沙薑雞翼食得多，用粉腸做就好少見，沙薑味非常香濃，重口味人士必點。

最愛小總評：

梗係鍾意佢夠正宗得嚟，仲調校至啱港人嘅口味啦，簡直係充滿獨特嘅川港風味！橋頭水煮魚火鍋雞煲唔單止夠惹味，仲顧及到健康元素咁sweet，如何可以不愛她？

橋頭水煮魚火鍋雞煲
地址：九龍城福佬村道95號地下（顯示地圖）
電話：5538 1338
備註：設加一，收現金及信用卡。
Facebook：橋頭水煮魚火鍋雞煲