【出街搵食】佐敦$168鐵板燒宵夜套餐 食齊4道菜 避風塘蟶子＋薄燒牛肉 再送啤酒！｜佐敦美食｜
撰文：ning 攝影：Man
師承松菱、有馬 重拾老本行鐵板燒
坐到吧枱，咦？眼前這位廚師，不就是兩年前憑着10層海膽杯，紅遍中環區的樂師傅？原來這店是繼中環S2 Kitchen以外，最近落戶這小區的姊妹店，做回自己當年在松菱、有馬等日本料理名店的拿手好戲：鐵板燒。
樂師傅出身自松菱、有馬等的第一代日本料理店，又是花盃的開國功臣之一，拿着鐵鏟一推一撥都是大師傅功架。坊間的鐵板燒賣拋樽轉刀花式表 演， 甚至用食材畫公仔影相打卡，Sorry，這裡通通都無，樂師傅只是踏實地拿着鐵鏟，砰砰嘭嘭炒個不停，俐落的推、撥、炒、灑鹽落醬，就是唯一「表演」，但更令人感受到職人的那種專注。
平民鐵板燒 宵夜4道菜$168有交易
這裡的鐵板燒，有套餐有散叫，價錢極親民，晚市最平$450已經食到9道菜套餐，食埋A5和牛或龍蝦都只是$750，但屬於夜貓一族的宵夜就更抵食，$168有齊沙律、海鮮、主菜、食事四道菜。除了沙律，全部在鐵板上即叫即做，保證熱辣辣。
海鮮可供客人二選一，由魚欄直接揀貨，款式和煮法都每日不同，有時是避風塘蟶子，有時是蒜蓉牛油貴妃蚌，有時是西京醬煎銀鱈魚⋯⋯避風塘蟶子最花工夫，蒜蓉逐少加油慢慢輕炒，半煎半炸成乾蒜，再加辣椒粒和蟶子同炒，蟶子食落爽彈，鹹辣惹味。
蒜蓉牛油焗貴妃蚌就用牛油炒香蒜蓉，輕煎蚌肉再灒上清酒，食落悉悉索索的爽口，帶點牛油奶香。
惹味薄燒牛肉＋日本十勝豚肉
主菜同樣二選一，可選捲上葱花蒜片的美國牛肉薄燒，或是煎日本十勝豚肉。前者將肉眼切成薄片，在鐵板上輕煎數秒，放上即炸蒜片及葱花，牛肉咬落 Juicy，葱香蒜香可口。
日本十勝豚肉用上嫩而多汁的脢頭位，煎至八成熟切粒，咬落肉感重，有嚼勁，連肥膏位都不放過，煎炸成脆卜卜的豬油粒，甘香無比。
飽肚讚岐烏冬 再送生啤！
吃完海鮮和肉類，再配個雜菜炒讚岐烏冬，有點澱粉質填飽肚子，吸滿燒汁的烏冬配香甜蔬菜，簡單的Comfort food，嘗辣的更可選擇加辣變指天椒炒烏冬。
同場加映！創意紙包蜆湯＋鐵板煎白鱔
若然不夠飽，這裡還有不少好食又過癮的創意菜式，例如鐵板紙包蜆湯，清酒昆布湯及蔬菜預先煲至半滾，用可受熱至230°C的高溫紙包成袋，在鐵板加熱後會脹起出煙，剪開紮口，撲鼻傳來熱湯香氣，湯汁清醇順喉，蜆肉嫩滑鮮甜。
另外也有煎鰻魚汁脆皮白鱔，魚皮煎至焦脆後起出，和鱔件分開另上，前者口感似足炸魚皮，後者則嫩滑鮮味。
邪惡甜品！牛油焦糖多士
這裡還有一款Secret Menu甜品，就是樂師傅當年在花盃的原創甜品：焦糖多士，坊間不少鐵板燒店都爭相仿效。麵包用牛油加砂糖，反覆煎至微焦，食落香甜脆卜卜。不過樂師傅說，這道甜品在Menu是找不到的，想食除了要講運氣，還要講暗號，下次不妨試試讚他「靚仔」，睇下食唔食到。
座位不算多，坐吧枱就可以近距離看師傅表演，邊吃邊和樂師傅吹水談笑聊天，好有氣氛。
S2鐵板燒
地址：佐敦偉晴街29-37號地下6號舖 （顯示地圖）
電話：2885 8955/2885 8278
營業時間：星期一至日6pm-2am
備註：設加一、收信用卡；鐵板燒套餐之食材會因季節性及時令略有變動；宵夜套餐只限星期日至四供應。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
