【自助餐放蛇起底組】生蠔+刺身 ~任食回本! 突擊「 新蒲崗 」放題店
撰文、攝影:自助餐放蛇起底組
前菜小食 ~ 日式料理樣樣齊
餐廳點菜是用落單紙,有刺身、小食、爐端燒、火鍋等。留意返,如果去食壽司的話,這間餐廳就未必合你心水,因為這裡無壽司食!生蠔紙獨立分開,每人每次可以點兩隻。食完刺身、日式小食就可以上雞煲及打邊爐,最後在外面拿甜品食就Perfect。
自助區有前菜可以拿,款式不算特別,都是螺肉、八爪魚、中華沙律等,日式料理方面有不同小食、天婦羅、爐端燒等選擇,天婦羅粉漿不會過厚、食落不太油膩,爐端燒有帶子串、雞鹽等,質素就一般般,另外仲有冷麵、拉麵選擇。
任食生蠔 超肥美! 刺身質素高
這間放題其中一個賣點就是任食生蠔,每人每次只可以點兩隻,這便可以keep住它最凍最新鮮時食,不怕一次叫太多隻放得太耐不新鮮。生蠔洗得乾淨之餘睇落都亦不錯,食落好肥美,而且相當Creamy,但它就不是那種帶濃海水鹹的生蠔,較滑身。另外刺身選擇亦不少,有帆立貝任食,帆立貝大大粒而且鮮甜,另外還有油甘魚、三文魚、有頭甜蝦等,刺身質素亦相當不錯。
生蠔每次每人可以要2隻。
每枱再送雞煲火鍋唔食都得!
除了任食日式料理及刺身外,每枱仲會送雞煲,雞煲份量不多,但勝在香料味出同雞肉嫩滑。食完雞煲可以加湯打邊爐,火鍋配料是任食,但選擇就不算特別多,質素亦認真麻麻,肥牛都好韌無牛味。火鍋不吃也罷,寧願留一些時間食生蠔、刺身、日式小食更好!
多款雪糕、飲品選擇 仲有自家製甜品
自助區除了有前菜外,還有雪糕、飲品、甜品自取。飲品有紙包和罐裝飲品,不想飲凍飲亦可以自己沖柚子蜜及菊花蜜飲。甜品是自家製,有啫喱、雜果涼粉等,都幾得意。門口還有個雪櫃有杯裝雪糕,味道選擇比起其他放題的多,芝麻味最好味,夠香濃。
總結:雖然$228不是特別平,但這個價可以任食肥美、Creamy生蠔,計返都相當抵食。另外刺身質素亦不錯,特別是帆立貝,大大粒又鮮甜,好快可以回本。雞煲份量不算特別多但好味;火鍋質素則麻麻,不點選都無所謂。餐廳亦不算特別大,但當日兩個人去都有張四人枱,坐得好舒服;服務亦不俗,上菜速度都幾快,仲會不時來清理枱上面的碟同蠔殼。
分數:7/10
赤山日本料理
地址:九龍新蒲崗祟齡街33號新蒲崗廣場二樓C38-C39A(顯示地圖)
電話:2267 7913
$228放題時段:星期一至日 6:30pm-11pm
用餐時間:2小時
備註:收加一
香港18區美食有甚麼推介?
新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。