【18區掃食】街坊導航掃盡「 上水小店 」! 食全港獨家腐乳豬扒飯+遊天光墟

上水小店 老闆暖心送粥 食客支持必吃腐乳豬扒飯

深水埗明哥派飯助基層人士，上水都有位財哥，每月派粥給長者。每逢派粥劵，晨早七點已有婆婆排長龍。十來分鐘，150張劵派畢，站在門前的老闆財哥，笑咪咪地說：「之前識個伯伯，佢話沙田有人派粥，我覺得好有意思就效法。」年初開始派粥給老人家，每月24、25日共派300張粥劵，接著下個月1號， 就可憑劵吃免費粥，當日財哥連早餐生意都不做，讓老人家可在店內慢慢食。「街坊見我哋派粥，有啲會主動嚟幫手做義工，有啲就買蘋果、米粉送畀老人家！」

粥劵細心分好時段，讓老人家減少等候時間。

小店幫長者，我們也可撐小店，來上水不妨試財哥的食物。自創腐乳豬扒飯，全港獨有，豬扒逐塊拍鬆，有柯打才生煎。重點是自家製腐乳汁，蘸豬扒撈飯，鹹香惹味。星洲炒米又會自己炒咖喱膽炮製，煎鹹魚肉餅，還混入陳皮及馬蹄，足料。

豬扒肉質軟腍juicy，蘸腐乳醬更惹味，與豬扒味道相夾，炒飯粒粒分明夠乾身。

先將鹹魚切粒，與豬肉碎、果皮、馬蹄等混合，搓成肉餅，肉餅彈牙，鹹香十足，粒粒馬蹄增加口感。

咖喱膽以咖喱粉、南薑、香茅等十多款配料炒成，香料味十足，又不會過辣，米粉炒得不油膩。

財哥在四兄妹中排行最大，自小便去車仔檔幫手，跟媽媽拍住上。

「我幫襯咗6、7年，知道佢哋每月會派粥，好有心。呢度出品都好足料，盆菜好食又唔貴，我過時過節都會訂！」

舊式茶餐廳格局，有卡位和圓枱，餐桌玻璃下，有一層間隔予客人放手袋銀包。
杜記茶餐廳
地址：上水新健街15號地下（顯示地圖）
電話：2671 1468
營業時間：星期一至日7am-5pm

兩鋪合一：涼茶 50年車仔秘方

上水舊墟，人情味小店何止一家？新祥街有家冰室與涼茶舖，緊緊連在一起，原來一家人所開。賣涼茶的秋嫂，從前在上水行樂戲院旁擺檔，廿四味、菊花茶，不少街坊由細飲到大。之後買下現時舖位，將它分兩邊，一邊賣涼茶，一邊由排行第六的兒子做冰室。
涼茶製作五十年如一，每早就煲，材料差不多佔半煲，真材實料。祛濕茶，加入玉竹和土伏苓等，外面就不會如此落本，更分有糖及無糖，秋嫂邊斟涼茶邊說：「老人家有糖尿病唔飲得甜，唔落糖，就飲得安心！」

以甘草和菊花等材料煲成，菊花味清香，入口潤喉，甜度適中。

這架不鏽鋼手推車於1979年訂製，現時放在舖內做招牌。

以廿款以上的藥材煲成，用慢火熬兩日，味道帶甘但不苦，飲後即覺喉嚨紓緩。

「8歲飲到而家幾十歲，秋嫂睇住我大，佢哋涼茶好足料，出面飲唔返。」

秋嫂三母女日日一齊開檔，二女負責煲涼茶，三妹負責收錢，秋嫂則任親善大使，與街坊傾偈。

兩鋪合一：冰室 本地蛋多士

涼茶舖為街坊著想，旁邊的冰室也一樣，賣的雖是一般茶餐廳食品，但製作認真。焗豬扒飯的茄醬，棄用罐頭，堅持自家製；西多士不是油炸，而是舊式的慢煎，較健康；雞蛋選用成本較高的本地農場蛋，貪其質素穩定夠新鮮，又可支持本地農業。走進店內，幫襯的大多是街坊，六弟雖不多言，但見熟客走進，一句「係咪照舊？」，就知他把每個食客放在心。

有齊炒鮮奶滑蛋、火腿、厚多士和支裝牛奶，滑蛋嫩滑Juicy，蛋香十足。

豬扒軟腍入味，充滿肉汁，蓋面的番茄及水牛芝士份量足，有拉絲效果，自家製茄醬有番茄香。

多士厚約1吋，煎得金黃，口感鬆軟，不油膩。

冰室可容納約40人，較為擠逼，但以餐廳來說都算乾淨。
樂樂冰室
地址：上水新祥街23號地下（顯示地圖）
電話：2672 8191
營業時間： 涼茶舖 9am-8pm、樂樂冰室 7am-5:45pm（冰室逢星期三休息）

良心麵包店 熱辣辣不停出爐

奶油包、豆沙包、芝麻豬仔包，愈來愈難搵，但在上水仍能找到這種童年味道。咬一口菠蘿包，口感紮實，皆因老闆鄧生堅持足料及無添加：「我啲包可能貴少少，但你出面食兩個先飽，我呢度一個就夠。」連附近的廣成冰室和蓮塘尾的榮昌茶座都向他取貨，質素有保證。好似豆沙包的餡，堅持自己炒。「紅豆浸過夜，先蒸再炒，咁樣先夠香，次次都要至少3個鐘。」老闆鄧生邊搓粉糰邊說。現時，老闆跟兒子，每天都駐店做包，日日開工14小時，幾乎每小時都有新鮮麵包出爐，香噴噴、脹卜卜，怪不得成為街坊的愛店。

前舖後工場，麵包不停出爐，每日出品數以千計。

麵包鬆軟綿密， 不死實，豆沙量足，入口甘香不過甜，打得幼滑。

菠蘿包脹卜卜， 外皮鬆脆，包底香軟。

「我住對面，幫襯好多年，最鍾意三文治同麵包，麵包口感好紮實，好足料。」

美琪飽餅屋
地址：上水新成路85號（顯示地圖）
電話：2671 1693
營業時間：星期一至日6am-7pm

通宵陪住你 客家鹽焗雞

從上水街坊口中得知，原來新康街有家街坊菜館，區內唯一通宵營業，是不少夜歸的上水人，回家前的歇腳點。開業十多年，點心、雞煲、小炒，慰藉多少上水街坊胃口。其中客家菜，由客家師傅主理，七、八十元一碟，份量勁多，口味地道。鹽焗雞肉質嫩滑，鹹香十足；客家燜豬肉，豬腩肉燜至少兩小時，半肥半瘦，入口即化。還有客家釀豆腐、客家三杯鴨、梅菜扣肉等選擇。想吃特別的客家菜，訂位時可向師傅要求，好似私房菜一樣咁靈活。

賣相澄黃油亮， 皮爽肉滑， 鹹度適中，想重口味點，可蘸沙薑或薑蓉同吃。

腩肉燜得軟腍，味道濃郁惹味，木耳爽口且吸盡精華。

有腰果、西芹、魷魚、蝦乾和菜脯，有鑊氣，魷魚尤其爽彈。

馬仔記客家菜館
地址：上水新康街57-59號地下（顯示地圖）
電話：2668 0168
營業時間：星期一至日24小時營業
備註： 茶芥$4/位，小炒供應至4am，點心24小時供應

晨咁早行老上水尋寶 天光墟幫襯婆婆買土產

寶，全部都係寶……遊上水，要早起，從天光墟尋寶開始。有班上水公公婆婆，每日天未光，大包細包走來，一把太陽傘，幾個發泡膠箱，土產蜜糖山草藥自家種菜蔬，排晒出來，這樣一個露天街市，在香港，已幾近絕跡。除非八號風球、黑雨紅雨，否則風雨不改。
檔口亂中有序，分蔬菜及海鮮兩部分。蔬菜區有不少自家種植蔬菜，又有坊間少見土產，但要注意，有些攤檔會用大陸菜扮本地菜，建議幫襯檔仔，買到大陸菜機會較低。公公婆婆非常健談，走近他們，便主動介紹他們的寶物，怕唔識煮？他們又如一本人肉食譜，分享煮法，行一轉不單背包滿滿，還可以長知識。

香蕉花蕾、大樹菠蘿

鑽地老鼠、土伏苓

天光墟約有60檔，檔位先到先得。

天光墟
地址：上水石湖墟郵局前（見到郵局繼續向前行轉左，空地便是）（顯示地圖）
延伸閱讀：
【18區掃食】尋覓10款「 上水 」名物!!! 手挫紅豆冰+炭火層燒腩仔+菠蘿蛋