【自助餐放蛇起底組】$159 雞煲 +火鍋+刺身通通任食!

今次又帶大家嚟到旺角兆萬搵嘢食,云云食店之中竟然搵到間$159就可以食到 雞煲 、打邊爐、刺身嘅餐廳,仲要係任食添啊!價錢咁平究竟係咩料呢?一齊睇下啦!

 

我哋5點半嚟到,用$129就可以食到雞煲火鍋放題,加多$30有埋任食刺身!先食刺身,然後再食雞煲再打邊爐!如果食完雞煲打邊爐想轉湯底就要每位另加$30,如果唔轉湯底就直接食完雞煲加清湯!2個鐘食到捧住個肚咁走!

刺身擺盤、色澤靚 唯冰感較重

加多$30就可以任食埋刺身,當然要試啦。刺身選擇都唔少,有油甘魚、三文魚、甜蝦等。一上枱刺身擺盤唔馬虎,有冰係底之餘仲有燈,睇落刺身色澤相當唔錯。整體刺身食落冰感較重,但呢個價食到呢種刺身,真係夠哂有凸。

雞煲份量夠哂多 香料味略嫌不足

食完刺身就嗌咗個雞煲食,雞煲嚟到嘅時候已經有8成熟,所以煮多陣就已經可以食。一打開雞煲芫茜嘅味道好出,望落雞嘅份量相當多而且每件雞Size平均唔會過大。雞食落肉質算唔錯,但就係唔夠香料嘅味,唔夠豐富。

火鍋醬料配料選擇多 加錢先可以轉湯底

食完雞煲直接加清湯打邊爐,事關轉湯底係要每人加多$30!喺火鍋配料方面,選擇都算幾多,淨係肉類同海鮮都已經十幾廿樣,再加埋啲丸、餃子、蔬菜、麵等等,一大版紙任揀。醬料出面自己調配,都有十幾種醬料可以揀,相當唔錯。

雞煲湯底影響食材味道 丸類品質唔錯

湯底唔加$30轉原來影響可以好大,雞煲湯底味同大部分食材都唔係好夾,食落真心怪怪地。丸類方面選擇夠哂多,而且食落質素唔錯,特別係貢丸同麻吉丸,有驚喜。

海鮮任叫任食 海中蝦正 其他就唔太新鮮

海鮮係任食,仲有「是日海鮮」,日日唔同,我哋食果日嘅是日海鮮係象拔蚌BB,任食都算幾吸引!雖然呢度嘅海鮮係任食,但食落嘅質素真心麻麻,唔太新鮮,貝殼類嘅更加係洗得唔夠乾淨。

飲品選擇多唔過甜 仲有荔枝味雪米糍食

呢間嘅飲品同甜品都係出去自己拎嘅,有兩個雪櫃嘅飲品可以選擇,試咗其中嘅支裝飲品,唔太甜又清熱。甜品有雪糕同雪米糍揀。

總結:價錢相當平,百幾蚊就可以任食雞煲、火鍋、刺身,喺選擇方面不論火鍋配料定醬料、刺身都非常多,刺身算幾新鮮就係冰感太重;雞煲份量夠但香料不足;若果火鍋唔加錢轉湯底,雞煲味同火鍋唔係太夾味道會有啲怪,海鮮亦唔夠新鮮乾淨,反而其他火鍋配料好似丸類就唔錯,上菜速度都夠快。環境方面,如果唔係坐卡位坐中間的話會較逼。

總分:6.5/10

壹火鍋

電話:2780 8399
地址:旺角西洋菜街1號兆萬中心16樓(顯示地圖
$159放題時段:入座時間5.30pm – 6pm
用餐時間:入座起計2小時(11pm後入座任食3小時)
備註:收加一

最新吃喝玩樂資訊