估你唔到fusion系列!鐵板 pancake 漢堡 & 西式肉醬兩面黃

「又鹹又甜?因住生飛滋!」細個嗰陣應該聽過唔少長輩講呢番說話,但偏偏有班80後唔信邪,將甜椰椰嘅楓糖漿 pancake ,加埋鹹鹹地嘅煙肉同煙燻火腿一齊當漢堡食!仲將啲肉醬意粉炸到脆卜卜,似足兩面黃!真係估你唔到喎!

80後主理 fusion玩味菜式

呢間LittleBreakCoffee&Kitchen 早前喺荔枝角開業,今年7月衝出九龍,喺上環蘇杭街開分店,主理店舖嘅係班不甘平凡嘅80後,負責人Will同Jan鍾意將佢哋喺外國生活經驗,融入食物同飲品入面,有時又會加入下一啲中式元素入西餐度,整下fusion 菜!

鹹甜鐵板pancake漢堡

呢味Ham So Excited,靈感係嚟自Will喺倫敦Breakfast Club食過嘅 pancake 漢堡 。Pancake夾住煙燻火腿,再以煎蛋同煎到香脆嘅煙肉片鋪面,食之前淋上楓葉糖漿,食落就好似將成份早晨全餐放入口咁,有糖漿嘅甜味,又有煙燻火腿嘅鹹香味,個味道都幾豐富!但如果唔鍾意又鹹又甜,建議一開始唔好加糖漿住喇!

兩面黃 x 肉醬意粉?

肉醬意粉幾乎人人都食過,但炸到脆卜卜嘅,你又食過未?整呢道脆炸意大利麵嘅靈感,竟然係嚟自同西餐大纜都扯唔埋嘅中國菜兩面黃!意大利麵炸至脆身,淋上以豬肉及牛肉製成嘅肉醬,中間夾住芝士,打破太陽蛋,讓蛋漿流入意粉入面再食,意粉好香脆,肉醬味道濃,夾埋都幾有驚喜!

肉汁Juicy豬鞍扒

上環店限定嘅菜式除咗脆炸意大利麵之外,仲有呢味烤美國豬鞍扒,豬鞍扒煎烤至八成半熟,食落有陣香烤味,肉質鬆化仲幾juicy!蘋果牛油汁唔係好濃味,可以揀配炸薯條或炸蕃薯條,記者試咗炸蕃薯條,蕃薯香味濃,同埋都幾夠份量。

橡皮糖味青檸梳打

齋食嘢唔飲嘢好dry喎!唔使急,依家就講嘢飲!呢杯青檸梳打其實係Lemon Lime Bitter,喺澳洲都幾hit,飲落先有好大陣青檸嘅酸味,跟住有種好似食緊青檸橡皮糖咁嘅味,甜甜地又澀澀地咁。

特濃抹茶蛋糕配澳洲式latte

呢款抹茶蛋糕睇落就唔係好吸引,但喺呢度都幾受歡迎,記者決定試一試。蛋糕表面烤得好脆,食落好似曲奇咁,內層蛋糕熱辣辣,抹茶味幾濃,但有少少乾,要加埋隔離嘅cream一齊食。如果俾多少少錢,便可以加杯咖啡,例如下圖中的Magic,就是負責人Jan 喺澳洲working holiday 時成日沖嘅咖啡,同latte好似,不過咖啡比例多少少,用嘅係double ristretto同埋日本牛奶,味道濃厚,有堅果香。

Little Break Coffee & Kitchen
地址:上環蘇杭街104號秀平商業大廈地舖(顯示地圖)
營業時間:星期一至五 11:00am-10:00pm;星期六至日09:00am-06:00pm
電話:2503 3535

延伸閱讀

「堅邪惡」新品! 焦糖布甸蛋糕

新假期優先試食會 Sweet Monster 爆谷雪糕
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8

Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!

最新吃喝玩樂資訊