超市
超市

【超市零食伏‧唔伏】即食凍蝦 VS 豆乳擔擔麵 邊款領嘢?

飲食

廣告

做傳媒這一行,開工開通宵多過坐巴士。所以好多行家都好興去超市買定小食放喺位,以備不時之需。今期同大家比拼一下各種辦公室醫肚良藥,當中有豆乳擔擔麵、拖羅味薯片、紫菜黑咖喱、即食凍蝦、壽喜燒罐頭及綠茶紅豆湯圓,到底邊個好味?邊樣最伏呢?即睇!

1. 甩拖羅味薯片

之前卡樂B 推幾款新口味薯片,好似關西醬汁及壽喜燒味道,評價還不錯。今次乘勝追擊推出拖羅味,食落就無咩料到,拖羅味欠奉,鹹味重,但有少少Wasabi 味,辣辣地,Okay!

售賣點:LOG-ON( 觀塘、又一城、朗豪坊及iSQUARE分店有售)
電話:2736 3866

2. 得個樣豆乳擔擔麵(最伏!)

大大隻字寫豆乳擔擔麵,期望食到豆乳香、花生味及辣味,可惜食落只有鹹豆漿味,太淡,麵又不夠彈牙,當普通豆乳麵吃無妨,要吃真正擔擔麵就出街食好過。

售賣點:全線一田超市
電話:3955 1818

3. 烏黢黢紫菜黑咖喱

唔講唔知,原來日本的黑咖喱,可用紫菜醬來做!日本佐賀著名出產海苔,所以推出了紫菜黑咖喱。顏色烏黢黢,微辣,加入了紫菜醬,所以吃落隱約有紫菜鮮味。加熱來吃伴飯都幾正!

售賣點:全線一田超市
電話:3955 1818

4. 彈牙即食凍蝦(推!)

CP 除了出雞蛋, 原來都有出凍蝦!從雪櫃取出解凍便可即食,質素重唔錯喎,蝦身好大隻,紥實而且彈牙,剝蝦時重要爆膏,食落竟然有鮮味。一包有五十幾隻,淨食或做沙律也不錯。

售賣點:AEON(將軍澳、禾輋分店有售)
電話: 2565 3600

5. 高質壽喜燒罐頭

罐頭食物一向給人感覺麻麻,但早幾日發現了由日本直送的壽喜燒牛肉罐頭,食落牛肉好香甜腍身,醬汁入晒味,重有爽口的芋絲、大葱及冬菇粒,撈飯佐酒都一流!

售賣點:759阿信屋(九龍展貿中心、荃灣、灣仔軒尼詩道、西灣河等指定分店有售)
電話:3960 9300

6. 脹爆綠茶紅豆湯圓

除了傳統口味外,今年小寧波都有出新口味,綠茶紅豆湯圓皮呈深綠色,食落有少少綠茶甘味,餡料內有原粒紅豆,甜度適中。湯圓皮好薄,食時在口中爆開,好有口感。

最新吃喝玩樂資訊