【出街搵食】日賣300碗!米芝蓮師傅主理!觀塘熱辣辣即燒叉燒煎蛋飯|觀塘美食|
【出街搵食】日賣300碗!米芝蓮師傅主理!觀塘熱辣辣即燒叉燒煎蛋飯|觀塘美食|

【出街搵食】日賣300碗!米芝蓮師傅主理!觀塘熱辣辣即燒叉燒煎蛋飯|觀塘美食|

平時去快餐店吃燒味,大多是中央工場預先製造,再送到店內發售,始終不夠熱辣辣和新鮮;但在觀塘東廣場這間快餐店,廚房內爐火正熊, 數串色澤紅亮、滴著汁的燶邊叉燒在爐內迴轉,準備出爐。來這裡斬大嚿叉燒,勺碗飯,加隻煎蛋,變一碗黯然銷魂飯,食飽再上班,不少觀塘打工仔、OL的浪漫,更創下日賣300碗的紀錄,認真巴閉。

撰文:ning 攝影:Fion

米芝蓮一星廚監製 即燒叉燒煎蛋飯

坊間快餐店燒味,大多是中央工場預先製造,再送到店內加熱發售;但這碗叉燒飯可以俘虜一眾觀塘打工仔、OL的原因,在於「即燒 」。幕後功臣是米芝蓮一星餐廳阿鴻小吃創辦人鴻師傅,去年在東廣場開新 Line,收起潮州滷水,改賣自家製叉燒、咖喱牛腩等港式輕食。

和阿鴻小吃的中菜館格局不同,這裡走自助快餐形式,但仍然乾淨企理坐得舒服。
雖然賣快餐,但鴻師傳仍不時親自監製食物的出品,絕不馬虎。

限量製作 靚叉燒四部曲

店內最人氣的叉燒煎蛋飯,叉燒密鋪得近乎不見飯,Juicy 多汁兼肉味濃,食得出醬料香;肉質腍滑鬆化,油脂筋肉層次分明,燶邊位尤其焦脆,配黏稠蛋汁,吃落好滿足。雖說賣快餐,但原來叉燒背後,做得份外用心。

叉燒皇煎蛋飯 $53

叉燒在店內即燒,每次小量製作,寧願邊賣邊燒,確保叉燒熱辣辣;只選最靚脢頭肉,切走頭尾,取中間的半肥瘦嫩肉,更要啤水啤足一小時,使其肉質脹起變腍,叉燒食落才不會乾柴嚡口。

脢頭肉要切得厚薄均勻,燒出來才不會太乾甚至唔熟。

醃叉燒同樣講究,以海鮮醬、磨豉醬、 炸蒜油、玫瑰露、葱薑等醃製,當中特別加入雞蛋,令肉質更滑。

叉燒醃足一小時,非常入味。

燒叉燒也分兩輪,先以接近 300°C高溫燒半小時,再浸上麥芽糖,待放涼回爐後再烤第二次,靚叉燒才正式出爐。

掛起叉燒也有竅門,長短要相近,熟度和火侯才會一致。
店內有部大電爐燒製叉燒,邊燒邊迴轉,令叉燒賣相、色澤達致均勻。
叉燒首次出爐後,要先稍為放涼,再蘸麥芽糖,吊乾後回爐再燒。

上碟前還有功夫要做,人家浸油令叉燒油亮亮,他就再浸麥芽糖,亮澤之餘更添蜜味;切法也有技巧,刀法用斜切,叉燒大大件,每碗 八、九片,更指定要幾片肥幾片瘦幾片火雞位,讓客人食到多種口感。連飯汁也用鮑魚汁、骨湯來做,惹味鹹鮮,撈飯一流;再加隻蛋變成叉燒煎蛋飯,就是最好的Comfort food。

叉燒切件奉客之前,再浸麥芽糖加添光澤及甜味。
叉燒每次限量燒製,密密出爐,夠晒新鮮熱辣。
叉燒飯用的飯汁,內裡加了鮑魚汁,甜中帶鮮,有鮑汁微微黏口的質感,拌飯吃特別香。

同場加映!叉燒漢堡、咖喱牛腩腸粉

除了叉燒煎蛋飯,鴻師傅更把叉燒和港式咖喱牛腩變成漢堡包和腸粉等小食。連阿鴻小吃招牌芥茉雞腳筋和滷水素鵝,這裡也有賣;另外還有蟲草花蒸雞飯和蝦乾蒸肉餅飯等套餐,難怪成為附近的上班族Lunch time甚至加班的飯堂。

將叉燒夾入烘得香脆的法包內,加埋煎蛋和芝士,中西結合,用來做下午茶,非常飽肚。

叉燒煎蛋漢堡軟法包 $26

偏向東南亞風的黃咖喱由鴻師傅研發了兩年,香辣但不嗆,腸粉即叫即拉,口感滑身,特別吃到米香;配上入味鬆化的牛腩,彈牙牛筯,層次豐富。

咖喱牛腩即拉腸粉 $65

鴻師傳

地址:觀塘成業街7號東廣場地下26-31號舖(顯示地圖
電話:2618 0168
營業時間:10:30am- 9pm
平均消費:$70/位
備註:不設加一、只收現金

延伸閱讀:

【出街搵食】觀塘23年老派茶餐廳 失傳超薄阿華田多士+葱花蛋多士|觀塘美食|

最新吃喝玩樂資訊