西九龍中心餐廳|10大必食推介!深水埗生炸雞髀+芝士瀑布漢堡|外賣食乜好

飲食

廣告

西九龍中心餐廳10大掃街推介!深水埗一直是美食天堂,而西九龍中心更加是臥虎藏龍,有不少食店林立,記者今次特意搜羅10間掃街必食推介,包括韓式炸雞、一口牛燒、港式喇沙湯麵、芝士瀑布雞堡、手工芋圓等。文末更附有泊車及地鐵前往資訊!

西九龍中心餐廳掃街!深水埗死場翻生 超過50間食店進駐!

西九龍中心是深水埗的地標,是不少學生和街坊必去落腳的好地方,商場一直以來都人流不斷。不過在疫情期間,不少店鋪受到防疫限制影響而被迫倒閉,商場亦曾經一度變成死場。隨著最近疫情放緩,西九龍中心的人流漸漸恢復,而且8樓的美食廣場更加有擴展跡象,6樓亦同時新增了一個小型美食中心,一共超過50多間餐廳,總有一間合你口味!

西九龍中心 深水埗 深水埗西九龍中心10大掃街推介!8樓美食廣場擴展了,有更多食店選擇!
深水埗西九龍中心餐廳10大掃街推介!8樓美食廣場擴展了,有更多食店選擇!(圖片來源:新假期編輯部)

10大掃街推介 逐間睇!

西九龍中心餐廳推介1. 皇帝雞 韓國店主秘製韓國炸雞

「皇帝雞」在商場開業將近10年,由韓國店主「姜老師」一手主理,主要供應韓國炸雞小食。炸雞分別有韓辣味、醬油味和甜辣味,亦設有3個不同大小份量。所有套餐都堅持即叫即炸,加上自家研發的秘製醬汁,雞件香脆嫩滑,年糕煙韌彈牙,配上醬汁食十分惹味!

西九龍中心 深水埗 深水埗西九龍中心掃街!「皇帝雞」由韓國店主主理,開業10年堅持每日7點到店準備食材!
「皇帝雞」由韓國店主主理,開業10年堅持每日7點到店準備食材!(圖片來源:新假期編輯部)

西九龍中心餐廳推介2. 辣丼爐 手撕雞刈包+香辣腸粉

小店開業約3個月左右,主打香辣手撕雞腸粉和刈包,單是刈包每日可以售出超過30份。手撕雞用上原隻雞全人手撕成,口感較為豐富,加上獨門辣醬,為舌尖增添多一份麻痹感。除了香辣手撕雞腸粉和刈包外,另有爆芫荽手撕雞小食、胡麻手撕雞冷麵、手撕雞手卷等供應,鐘意食手撕雞的朋友唔好錯過啦!

西九龍中心 深水埗 香辣手撕雞刈包$25),配有手撕雞、青瓜、栗米、芫荽和紅蘿蔔,以刈包作為掃街小食一口接一口,好方便!
香辣手撕雞刈包($25),配有手撕雞、青瓜、栗米、芫荽和紅蘿蔔,以刈包作為掃街小食一口接一口,好方便!(圖片來源:新假期編輯部)

西九龍中心餐廳推介3. 圓燒 一口牛燒小丸子 日賣800粒!

掃街又點少的日式小丸子呢!「圓燒」除了一般的章魚小丸子如明太子、芥末口味外,還有坊間很罕見的「一口牛燒」,高峰期間更加日賣超過800粒!一口牛燒的內餡由椰菜、櫻花蝦和一口牛柳粒製成,每一啖都好足料,相比中間食到章魚,食到一口牛更加滿足呢!

西九龍中心 深水埗 一口牛燒$26/4粒),很有創意的日式小丸子配搭,小丸子好足料,千祈不要睇少4粒的飽腹感!
一口牛燒($26/4粒),很有創意的日式小丸子配搭,小丸子好足料,千祈不要睇少4粒的飽腹感!(圖片來源:新假期編輯部)

西九龍中心餐廳推介4. Hunger Burger 邪惡芝士瀑布漢堡

小店店門以美國街頭風作為設計主調,用上發光招牌,在整個8樓美食廣場內都特別顯眼。Hunger Burger顧名思義,供應約10款漢堡,其中芝士瀑布雞堡憑藉其邪惡的外表成為店內的打卡人氣食物,雞堡在高溫鐵板上燒熟,肉質更為嫩滑juicy,而且淋上特調芝士醬汁,賣相誘人!加$15可以升級至套餐,分別配有薯格和飲品。

西九龍中心 深水埗 芝士瀑布雞堡$60),整個漢堡被滿滿的芝士醬蓋住,畫面超級澎湃,此款漢堡只限堂食。
芝士瀑布雞堡($60),整個漢堡被滿滿的芝士醬蓋住,畫面超級澎湃,此款漢堡只限堂食。(圖片來源:新假期編輯部)

西九龍中心餐廳推介5. 喇沙專門店 濃郁喇沙湯底+港式牛脷

想食主食一樣多不勝數,其中開業已有5年的喇沙專門店主力供應12款喇沙麵,包括雞扒喇沙、大蝦喇沙、野菌肥牛喇沙、牛脷喇沙等,喇沙湯底加入椰漿更加濃郁,搭配爽口牛脷和吸湯豆卜,忍不住一口接一口食晒整碗麵。小店另有冬蔭功湯麵提供,下次可以一次過食2款湯底呢!

西九龍中心 深水埗 牛脷喇沙麵$50),喇沙湯底用上一小時熬製,再於客人下單後重新翻熱上枱,香噴噴熱辣辣!
牛脷喇沙麵($50),喇沙湯底用上一小時熬製,再於客人下單後重新翻熱上枱,香噴噴熱辣辣!(圖片來源:新假期編輯部)

西九龍中心餐廳推介6. 熊BB 巨型芝士鍋+掃街小食杯

商場新設了不少新食店進駐,「熊BB」剛開業不到1個月,以放置在店門口的巨型芝士鍋和開心熊仔杯作為小店招牌。當中店主推介第一次可以先試「King Bear意粉」,加入了煙鴨胸、牛柳粒和雞絲與意粉一併炒熟,最後在巨型芝士鍋上沾上熱溶芝士,鹹香味濃而且好適合打卡影相!另外還有開心熊仔杯,同時裝有炸物小食和沙冰,掃街良品!

西九龍中心 深水埗 巨型芝士鍋是一大睇頭,看著意粉減上香濃芝士很吸引!
巨型芝士鍋是一大睇頭,看著意粉減上香濃芝士很吸引!(圖片來源:新假期編輯部)

西九龍中心餐廳推介7. Pure Taro 份量驚人手工芋圓糖水

食完一輪主食當然要食甜品,8樓美食中心扶手電梯旁邊的糖水店「Pure Taro」主打手工紫薯及芋圓,同時亦有供應天然茶飲,款式超過60種!招牌糖水分別有人氣「芒果牛奶手工芋圓」、「招牌芒果粒手工芋圓」、「綜合芋圓仙草凍」等,每碗糖水都大過塊面,而且用料好足,2個人先食得晒!

西九龍中心 深水埗 芒果牛奶手工芋圓$30前),一份糖水的份量大過記者塊面,份量十分驚人!牛油果太陽蛋$39後)為小店新品,牛油果鮮奶配上芋圓,健康又飽肚。
芒果牛奶手工芋圓$30(前),一份糖水的份量大過記者塊面,份量十分驚人!牛油果太陽蛋$39(後)為小店新品,牛油果鮮奶配上芋圓,健康又飽肚。(圖片來源:新假期編輯部)

西九龍中心餐廳推介8. 圓圓小姐台灣女生創辦

圓圓小姐由台灣女生來港創辦的台式茶飲店,雖然分店沒有其他連鎖式的手搖飲品店多,目前只有3間,但是其煙韌珍珠和濃郁奶茶茶底卻成功俘虜不香港人。接近50款水果茶、鮮奶茶、黑糖珍珠等款式,作為掃街的解渴之選就最好不過了。

西九龍中心 深水埗 圓圓珍珠奶茶左)中$24、大$27;香橙柚冰茶右)中$29、大$34。
圓圓珍珠奶茶(左)中$24、大$27;香橙柚冰茶(右)中$29、大$34。(圖片來源:新假期編輯部)

6/F美食廣場

除了8樓食廣場外,西九龍中心的6樓亦新建了一個小型Food Court,目前只有約6-7間食店,不過每間小店都各有特色,等大家親自到訪去發掘!

西九龍中心 深水埗 6樓新設了小型Food Court,約6-7間食店,同樣設有堂食區供客人買完坐下用餐。
6樓新設了小型Food Court,約6-7間食店,同樣設有堂食區供客人買完坐下用餐。(圖片來源:新假期編輯部)

西九龍中心餐廳推介9. 和順記 即叫即炸重量級生炸雞髀皇

在油麻地發圍,向來以超巨型生炸雞髀深得港人歡迎的「和順記」都登陸了這個掃街重地!與其他分店大同小異,小店同樣有供應其名物——生炸雞髀王!做法有別坊間一般食店的炸雞髀,和順記採用韓式醃肉方法,將菠蘿、甘筍、檸檬、番茄、水果製汁醃足4小時,果酸讓果肉變得更滑嫩。而且即叫即炸,肉質更加juicy!

西九龍中心 深水埗 生炸雞髀皇$40)為小店招牌名身,成隻手掌般大,而且肉質滑溜juicy,難怪深得港人喜愛。
生炸雞髀皇($40)為小店招牌名身,成隻手掌般大,而且肉質滑溜juicy,難怪深得港人喜愛。(圖片來源:新假期編輯部)

西九龍中心餐廳推介10. 「華」雪糕店 日本進口特濃8.0牛乳軟雪糕+一口軟雪糕

近期受到雪糕關注組熱捧的人氣雪糕店「華」由老闆「背心清涼哥」主理,不定期會推出期間限定雪糕口味,例如Tiramisu、開心果、波子汽水口味等。經典特濃8.0牛乳雪糕由日本直送,每一口都充斥著牛奶香!另外特濃黑朱古力更加有「平民版Godiva」之稱,看來朱古力味道一點也不弱。除了正常尺寸,只有約手指大的一口軟雪糕亦很受大人細路歡迎,夠可愛盞鬼!

想睇更多雪糕款式?即睇:深水埗「華」雪糕店!日本特濃8.0牛乳+一口雪糕+黑朱古力|區區搵食

西九龍中心 深水埗 人氣雪糕店「華」由老闆「背心清涼哥」主理,除了老闆有型,雪糕都好有誠意!
人氣雪糕店「華」由老闆「背心清涼哥」主理,除了老闆有型,雪糕都好有誠意!(圖片來源:新假期編輯部)

泊車優惠:

西九龍中心共設有5層地庫停車場,超過700個車位,客人以電子貨幣消費滿$200及持有以下憑證供職員核對及拍照,即可享有泊車優惠:

  1. 有效即日電子貨幣消費收據正本
  2. 消費時使用信用卡、八達通卡或手機支付記錄等(必須與收據內容相同)及
  3. 相關店鋪發出的機印收據到1樓停車場辦事處登記,即可獲得免費泊車優惠
電子貨幣消費泊車優惠條款及細則
優惠時段 免費泊車時數
7am-6pm 2小時
6:01pm-11pm 4小時

備註:最多接受2張不同商鋪即日電子貨幣消費收據登記,不接受現金交易收據

2022年度泊車收費
時租 私家車 貨車
星期一至五 $26/每小時 $38/每小時
星期六、日及公眾假期 $28/每小時
夜泊優惠
9pm-翌日8am $100 /
西九龍中心 深水埗
西九龍中心(圖片來源:新假期編輯部)
  • 商場:西九龍中心
  • 地址:九龍深水埗區欽州街37K號
  • Facebook:DragonCentreMall
  • 如何前往:乘坐地鐵到深水埗C1出口步行約5分鐘

常見問題

深水埗西九龍中心設有泊車優惠嗎?

有,買滿指定金額最高可享4小時免費泊車優惠,詳情按此

坐地鐵如何前往深水埗西九龍中心?

乘坐地鐵到深水埗站步行約5分鐘即到,詳情按此

圖片來源:新假期編輯部

最新吃喝玩樂資訊