街坊新店! 海膽黑松露芝士牛肉漢堡 |荃灣有咩好食|

海膽+黑松露,可以話係與女神約會食飯嘅必叫之物,只不過大家都深知呢幾款都係「貴夾唔飽」之物,無過千元去西餐廳都未必成到事!之不過,凡事又無絕對嘅!身處喺荃灣嘅一間街坊手打漢堡小店都一樣幫你實現到,其海膽黑松露芝士牛肉漢堡,份量十足,重點係,埋單都唔駛$100,既可以滿足女神,又食得飽自己。

海膽黑松露芝士牛肉漢堡 $98

呢款極盡邪惡嘅漢堡用上半板智利海膽、半隻手掌大嘅匈牙利鵝肝、手打美國牛肉漢堡扒再配合熱溶芝士同黑松露醬,淨係睇食材嘅陣容已經無得輸!以為咁多種濃味食材肯定會互搶focus,唔知食緊邊樣打邊樣?效果比記者想像中好,海膽、鵝肝、黑松露醬結合之下,竟然同漢堡扒味道非常之match,味道分明,如果女神到時話驚脂肪膽固醇乜乜乜?叫佢同你一齊食咗先講啦!

小店一直堅持手打漢堡扒,有牛、豬、羊、雞,任君選擇,當中以牛肉最馳名!店主堅持用肥瘦為七三比例嘅美國牛肉,再加入洋蔥、乾蔥同雞蛋攪勻,並用人手打至起膠,醃夠一晚等牛肉入哂味,第二日再等客人「柯打」,即叫即煎,包惹味!

自家製手打紐西蘭羊肉漢堡黑松露撈麵配煙肉 (包飲品)$78

唔啱食漢堡,食意粉都係個唔錯選擇!意粉同樣可加配手打漢堡扒加黑松露,加埋自家製嘅撈麵汁,唔怕個意粉越食越乾!

此羊肉漢堡扒嘅羊肉來自紐西蘭,一食就湧上濃濃嘅羊味,愛食羊肉者必叫!

EC 台式鹽酥雞印尼撈麵 $38

印尼撈麵為記者於中學那些年嘅最愛之物,除咗係街坊老店有得食之外,都好少見到大餐廳有得食!口感脆滑嘅鹽酥雞,加兩個印尼撈麵麵底確係勾起記者唔少學生哥時期,同成班中同放學去小店覓食嘅回心憶~

番茄肉醬芝士薯條 $28

粗切薯條加熱溶芝士已叫人回味不已,而家再加埋酸酸甜甜嘅番茄肉醬,食完又想Encore!

此為元朗EC Kitchen之分店,荃灣分店比元朗分店闊落、多位,環境較舒適,但位置於住宅商場內,對於唔係住喺附近嘅食家們會較不就腳。

EC Kitchen

地址:荃灣青山公路633號灣景花園商場地下(顯示地圖
開放時間:星期一至日,11:30am-10:30pm
電話:2116 4018
延伸閱讀:

菠蘿包變漢堡包?! 港式Fusion茶餐廳|灣仔有咩好食|

跟翠如食好嘢!即製牛肉流心芝蛋漢堡 | 九龍灣食乜好

新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
 
想最快接收第一手的旅遊飲食資訊?Easy
1.
先分別讚好「新假期周刊」及「新假期Jetso 」兩個Facebook專頁
2.
在「讚好」按鈕下揀選「搶先看」,搞掂!

最新吃喝玩樂資訊