秋日進補│刺激、溫和熱選 滋補火鍋 ＠Dining娜
秋天充滿涼意又乾燥，如果打邊爐都可以滋補、養潤身體就好喇！火鍋控總係有兩類人：一係鍾意刺激，一係熱愛溫和嘅火鍋湯底，唔使煩，不倒翁有齊晒刺激、溫和嘅選擇：成都麻辣田雞鍋、馬卡湯底，都係今期兩大 滋補火鍋 熱選推介！前者食落暖胃，後者補而不燥，更可以抗疲勞，都市人最啱。另外，不倒翁係肥牛同活海鮮專家，去到一定要食靚牛、時令罕有海鮮！
刺激麻辣鍋 VS 馬卡 滋補火鍋
不倒翁嘅成都麻辣田雞鍋做法正宗，用上多種辣椒、香料包括辣椒、花椒、乾辣椒、紅椒、京葱、蒜頭等，仲有四川麻辣秘方炮製，辛香麻辣風味俱備，刺激之餘，亦有驅寒祛濕功效，可以將夏天積埋嘅濕氣同經常出入冷氣間嘅寒氣驅除，個人舒服晒。先飲湯即刻令人醒胃、食慾提升，然後先慢慢歎火鍋。
糅合辣椒、花椒、乾辣椒、紅椒等炮製，充滿具層次感嘅四川麻辣香，推介配搭嫩滑嘅田雞食用。
我Dining娜都好似一般都市人同打工族咁周身「都市病」：容易攰、瞓得唔好或失眠、壓力大……近年興起食有「秘魯人參」之稱嘅馬卡，而不倒翁都有 滋補火鍋 馬卡湯底，師傅用秘魯馬卡熬成湯底，味道樸實同有種清淡甜味。馬卡湯滋補溫和，對於提升睡眠質素、抵抗疲勞、紓緩壓力好有效，邊食火鍋，再配埋馬卡茶飲用，係升級嘅健康養生食法。
精選秘魯馬卡，加入黨參、圓肉、杞子等熬煮，補而不燥，都市人飲用有對抗疲勞、恢復體力嘅功效。
靚肥牛專家
根據非正式統計，香港九成火鍋控打邊爐都必點肥牛，識食嘅梗係食不倒翁嘅牛脊位啦，油花細緻均勻唔再講，灼後依然爽嫩、牛味豐富，就最令嗜牛族滿足。靚肥牛配濃味嘅麻辣鍋可以盡吸惹味精華；配清淡嘅馬卡湯底則能夠提鮮，係必食嘅火鍋百搭配料。
店主最推介嘅肥牛部位係脊位，因為油花細緻均勻，灼後爽嫩甘香，牛味豐富。
犀利！全年食到罕有時令海鮮
唔少火鍋店嘅海鮮供應經常受時令影響，但不倒翁從來都無呢個擔憂，皆因店主洪哥同多間活海鮮供應商熟稔，多種稀有海產如花英斑、紅瓜子斑等都可以預留畀他，所以一年四季都能食到又靚又特別嘅海鮮。加上即叫即劏，無論做刺身或火鍋配料一樣頂級鮮甜！
當造嘅海杉斑、蟶子、加拿大頂級象拔蚌嘅海鮮即叫即劏，鮮甜度同雪藏貨無得比，海鮮迷最愛！
買手一般會選3斤重份量，貪佢啖啖肉之餘，肉質彈牙鮮甜，刺身或火鍋品嘗都好，亦可以一碟兩食。
鑊氣小炒、清酒選擇多
不倒翁又點止打邊爐，秋風起最想食香口嘢，呢度嘅鑊氣小炒都好有水準，可以轉轉口味試下，炒雜菌、椒鹽鱔球、避風塘茄子都係人氣小炒，鑊氣足，香口惹味，佐酒更是一流！店內亦有多款清酒、紅白酒選擇，配火鍋或下酒菜都好夾～
秋日菇菌最當造，將靈芝菇、雞油菌、冬菇、秀珍菇簡單以辣椒、豉油炒香，微辣惹味，相當開胃！
