盛夏海鮮自助餐@Dining娜

(Presented by 8度餐廳)

自助餐嚟講,我都幾鍾意8度餐廳嘅出品,除咗貪佢花款多,時不時都有新嘅主題buffet,更重要係價錢親民得嚟,食物品質又有保障。今個暑期,8度又有新搞作,推出夏日海鮮盛薈自助晚餐,上星期我Dining娜就有幸可以率先試食,想知有咩必食推介就繼續睇落去喇!

精選海鮮源源奉上

Buffet主題叫做「海鮮盛薈」真係一啲都冇錯,成個海鮮吧鋪滿嚟自世界各地嘅當造海產,款式夠多夠齊,有法國同美國空運到港嘅生蠔;有嚟自紐西蘭嘅青口;有巨型皇帝蟹腳;仲有海螺大蝦等……作為一個海鮮控,我應該至少encore咗3 round。

地道異國風味菜

齋食新鮮海產又點試到大廚嘅真功夫,梗係要品嘗埋其他海鮮菜式啦!今次大廚就運用咗各種海鮮入饌,配合埋日本、泰國、越南、中國等多國食材同香料,炮製出風味十足嘅海鮮美食,包括泰式咖喱布朗蟹、蒜香大頭蝦配香草牛油汁同埋避風塘軟殼蟹等。

除咗海鮮美食,環球風味菜一樣令人驚喜,例如有充滿法式風情嘅香煎鵝肝配黑松露汁,自助餐可以食到鵝肝已經夠晒高級,仲要加埋黑松露汁更顯矜貴;想食得潮啲又有韓式芝士排骨,芝士非常香濃,包住軟腍排骨食完全係雙重味覺享受!另外仲有燒特級牛肉、香草烤羊扒、韓式炸雞翼……數之不盡嘅美食。

精緻甜品

食完一輪鹹嘢當然要到甜品出埸。嚟得8度食自助餐又點可以錯過得獎甜品芒果拿破崙,大廚特別選用咗菲律賓呂宋芒製作,果香味非常濃郁,果肉又甜又多汁,話佢係皇牌必食之選無誤。另一款用芒果造嘅甜品係梳乎厘,師傅現場即製,夠晒新鮮熱辣,香氣撲鼻。仲有一個吸引之處,就係呢度可以任食Häagen-Dazs雪糕,平時一杯都廿幾蚊,淨係呢點都值回票價!

食抵啲啲

雖然話$448起就食到咁豐富嘅海鮮盛薈自助餐已經物超所值,但有著數無理由唔開心share。而家只要透過酒店網站預訂或者用指定信用卡埋單就可以享有高達8折優惠,滿4個人一齊惠顧,當月生日嘅客人仲可享半價或者免費生日蛋糕1磅,供應期有限,想食就要快喇!

 

夏日海鮮盛薈自助晚餐(8度餐廳)
地址:土瓜灣九龍城道199號8度海逸酒店大堂(顯示地圖
電話:2129 1960
收費:成人$448起 /長者$398起 /小童$318起
供應期:2016年7月1日至9月30日

關鍵詞
7大美食

最新吃喝玩樂資訊