牛肉火鍋 $48/碟堅平!!刁鑽部位牛扑肉、金花趾

香港人愛打邊爐,而且必食牛肉。最近大埔有間 牛肉火鍋 店,餐牌只有牛肉刁鑽位,封門柳、金花趾和牛心腚等17款選擇,坊間少見,劃一$48/碟,超級便宜,即睇詳細試食報告!

撰文: Joan | 圖片:Candy

刁鑽部位 牛肉火鍋

店舖有相熟買手雄哥,經五豐行每日入口秦川騸牯黃牛,即閹牛,指定要4歲的牛,貪其脂肪肥美,肉質特別嫩滑。牛肉早上屠宰下午才送到店內,保證新鮮。店家都是收貨後才知當晚有什麼部位供應,每日下午約4pm會在自家Fb交代來貨,以免客人撲空。火鍋料另有少量蔬菜可點,就連湯底都只得一款牛骨清湯,用大量牛筒骨、雞骨、白蘿蔔和粟米熬煮6小時,未放肉已聞到香濃牛味。雖然可以訂位,但肉類不設預訂,想吃的就早點去吧。

牛肉部位 介紹返

店內有張牛肉分佈圖,店員亦會細心解釋和作出推介,另每款肉均輕灼5-6秒稍稍變色便可食用,牛骨髓則可灼15-20秒。

A. 胸口膀
前胸的一小塊脂肪,可分別剝15秒和3分鐘試試兩款不同質感,前者非常爽口,完全不肥膩;後者則腍身似肥膏質感,帶微微牛油香。

B. 匙肉
則牛肩胛,肉中間有條薄身的肉筋,但較腍滑易咬。店家亦建議可將匙肉和胸口膀同時食用,先將胸口肪涮10秒,再加入匙肉多涮5秒再一同食用,享受爽口鮮嫩的口感。

C. 牛朴肉
即牛頸脊,油花分佈密集,肉味香甜濃郁,肉質柔嫩且有咬口。

D. 牛骨髓

取貨後會清洗乾淨,食落新鮮滑身,不含雜質。

E. 封門柳
橫膈膜下一面的一條肌肉,肉味是眾多部份中最濃,入口軟腍,每枱限叫一碟。

F. 金花趾
前小腿的一塊肌肉,每隻牛只有兩條,份量較少,油花多,肉質最爽口,每枱限叫1碟。

首次落單後店員會附上一個計時二十分鐘的沙漏,未能於二十分鐘內上桌的食物即免費送出,有夠瘋狂!暫時開店幾日未試過失手。

店內空間頗闊,有強勁冷氣,牆上油畫以街市作主題,幾得意。

616牛肉火鍋專門店

地址: 大埔翠怡街3號翠怡花園B座地下18號舖 (顯示地圖
電話: 3565 6878
營業時間:星期一至日 6pm-2am

延伸閱讀
慈雲山小食館 致敬! 原址重賣「聯合國」、「炸蛋」|慈雲山食乜好|

最新吃喝玩樂資訊