北角歷山酒店自助餐網民真實食評！細數5大伏位：質素似酒樓、食物唔Refill！｜自助餐我要
撰文：Mila｜圖片及資料來源：自助餐/放題/飲食/酒店優惠情報分享Facebook專頁、Staycation Hong Kong Hotel – 留港度假 本地酒店住宿優惠Facebook專頁、香港自助餐夾食集中討論區Facebook專頁、香港酒店工會Facebook專頁、Alfred Chan Youtube、新假期資料庫
歷山酒店自助餐5大伏位 網民食到一肚氣
歷山酒店自助餐本以款式豐富作招倈，美食有冰鎮海鮮如即開新鮮生蠔、加拿大蟹腳、波士頓龍蝦，更有法國鴨肝醬拼松露醬、火雞伴栗子、迷迭香烤羊扒等。
疑似歷山酒店員工爆料
歷山酒店自12月2日開業以來就已經引來眾多負評，最近更有疑似員工於FB專頁「香港酒店工會」爆料，種種服務強差人意並非酒店員工問題，而是管理層面出現5大問題！根據內文，歷山酒店管理層為了開源節流而不斷壓榨員工，以致服務質素差劣。
1. 缺乏人手但不增聘餐飲人員：在極度缺乏人手的情況開張，總共只有26名樓面、廚房、洗碗員工，每日應付至少400至500位自助餐及散餐食客。酒店並不想增聘人手，叫其他部門（如人事部、房務部）落自助餐場幫忙，因此才會被客人認為服務人員不專業。
2. 不衡量酒店接待能力，只懂一味拉客：在開張前一個月，酒店經理要求員工不斷打電話給舊客，詢問是否有歷山酒店自助餐興趣。酒店經理「鼓勵」餐飲員工，認為他們很重要，要靠他們養起所有部門的人，要求員工不停拉客，增加客流量以維持收入。
3. 員工工時長、沒有時間休息：員工需要返朝9晚12，忙到甚至沒有時間吃飯、坐下休息。而且這樣高強度的工作沒有補鐘、沒有加班費。後來請散工也不過是$60/小時。
4.缺乏人手留在自助餐場：所有員工準備set好自助餐場後便要即時去備貨。而廚師則要負責兩條buffet line，無辦法應付，這才沒有辦法給顧客提供最後品質。
5.士氣低落：但餐飲員工工作量太大，加上管理層壓榨的手法令他們備感灰心，而大量辭職。並非管理層如公告即時更換團隊。
網民評論
1. 食物Refill得太慢 經常吉盤
有食客就表示自助餐只係開始左半個鐘，但已經見到大量熱葷菜式供不應求，出現空盤情況。冰鎮海鮮亦不例外，別說龍蝦，連平時被冷待的白灼蝦也被「洗劫一空」，更別說是凍蟹腳。就連湯都不能倖免，全被掃光光。
2. 多項食物要排長龍先拎到
熱門的菜色如生蠔、燒牛肉和煎鴨肝都非常多人排隊，要排15分鐘先拎到，仲要限量領取。如果想食齊呢3樣野，淨係排隊都已經要45分鐘。再加埋沒完沒了的等Refill嘅時間，分分鐘等嘅時間仲長過你食嘅時間。這是廉價自助餐常用的成本控制手法，想食到回本？真係唔洗諗。
3. 魚生刺身鮮味欠奉
自助餐並沒設於刺身檔，想食刺身需要另外寫紙嗌，酒店就解釋這是因疫情關係採取的措施。不過味道方面就不能拿疫情做藉口了。刺身的質素認真一般般，不僅鮮味欠奉，仲有陣腥味，不太新鮮，比較正常的是帶子和蝦刺身。
4. 食物質素欠佳 生蠔唔乾淨食到肚痾
另一個網民鬧得最多嘅就係食物質素差，龍蝦細而無味又無膏，魚生唔新鮮。每人每次限拎3隻嘅生蠔不單只細隻，仲被網民指控處理得唔乾淨，食到肚瀉。
另一位網民亦表示食完歷山酒店自助餐之後肚痾，並懷疑係冰鎮龍蝦及海鮮出事。
5. 座位安排差 服務質素似酒樓
酒店自助餐分開兩個場坐，分別是「歷山餐廳」及宴會廳。「歷山餐廳」的裝修較為新穎，食物擺設也比較雅致。宴會廳的裝修則比較瑰麗堂皇，但就似係臨時改裝黎做自助餐場。職員就話兩邊食物係一樣，但網民就發覺兩邊有分別，「歷山餐廳」的食物種類比較多和吸引。
此外，網民更表示宴會廳的員工態度散漫，服務似做開酒樓，完全沒有在酒店食自助餐的感覺。很多網民亦反映宴會廳中使用的枱布過長，很容易踩或被絆倒，尤其是帶著小朋友去食自助餐就更加危險。
手提電話在宴會廳亦收唔到訊號，要問職員拎wi-fi密碼先上到網。
宮廷式裝修毀譽參半
歷山酒店最大的賣點就係維多利亞宮廷式裝修，驟眼睇落的確度度都很適合打卡。不過網民對此設計似乎唔多買單，直指其裝修風格十分土豪，似澳門賭場多啲。
坐「歷山餐廳」待遇好啲？
雖然大部分網民的意見都是劣評，他們主要是坐在宴會廳的客人。但亦有個別被安排坐「歷山餐廳」的網民持有不同的意見，並稱沒有遇到這些的問題，仲大讚酒店的自助餐。未知是否因為場地不同所以體驗有差別。
更多評語可以睇片！
酒店知衰 更換廚師救亡！
聖誕自助餐畀咗訂金可以點做？
開業短短1星期就收到咁多負評，引來集體取消訂位潮，可能係群情太過「洶湧」，編輯部向酒店查詢，酒店方面表示會更換廚師團隊救亡，希望短期內能夠改善表現，挽回食客。至於表現如何就有待觀察了。
而由於限聚令所限，10/12開始6點後將不能供應堂食，繳付了訂金及預訂了聖誕期間自助餐的客人，酒店有以下幾項安排：
1. 可改作午餐自助餐使用
2. 可改為1月份用餐
3. 可申請退款，已繳付款項會退回客人預訂時使用的信用卡
撰文：Mila｜圖片及資料來源：：自助餐/放題/飲食/酒店優惠情報分享Facebook專頁、Staycation Hong Kong Hotel – 留港度假 本地酒店住宿優惠Facebook專頁 、香港自助餐夾食集中討論區Facebook專頁、香港酒店工會Facebook專頁、Alfred Chan Youtube、新假期資料庫
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
