【18區掃食】柴灣搵食 做lab飲朱古力 + 熱辣辣串燒

柴灣 雖然唔太就腳,又冇咩街行,但呢度除咗勁出名的叉燒燒肉店同任食海鮮打邊爐之外,其實仲有好多好嘢食,今次我哋一於食盡柴灣!

 

柴灣 隱蔽Cafe 做實驗整朱古力?

青年廣場落成之後,一直以為入面只得青年旅舍比人住,原來入面係有食肆,有食肆,有食肆(很重要所以要講三次)。最特別係呢間cafe,用研究室做主題,連menu都設計到好似筆記咁,分晒Chapter,幾得意,出面仲有片草地,夠relax。

Cocoa Lab可可研究室

地址:柴灣柴灣道238號青年廣場12樓(顯示地圖)
電話:3421 0328
營業時間:星期一至日8am-6pm

宵夜必吃串燒+丼飯! 仿日本街邊小檔

呢間小店有齊刺身、壽司、丼飯、串燒同炸物,選擇夠多,啱晒貪心的香港人,一次過食晒心頭好。門口串燒位,做到好似個亭咁,有少少日本街邊串燒檔的感覺。老闆話佢哋特別搵師父整,客人喺門外都可以望到燒串燒的情況,仲要開到2am,夜鬼啱晒。

熊本壽司刺身外賣專門店

地址:柴灣怡順街3號地下(顯示地圖)
電話:5409 5523/ 9286 2371
營業時間:星期一至日12nn-2am

人氣小店 歎平版Oddies

Oddies之前推出雞蛋仔加雪糕,引得大家瘋狂洗版,但成$50杯唔係個個捨得食。好在呢間人氣雞蛋仔專門店,最近推出唔少新品,雙球雪糕杯都係賣$18,同Oddies的差唔多,勝在夠平,食完唔肉痛,仲有金莎朱古力格仔餅添。小店仲寫明選用新鮮雞蛋,唔用蛋精和椰精,連bb都食得!

BB雞蛋仔

地址:柴灣柴灣道350號樂軒臺地下413號舖 (顯示地圖)
電話:從缺
營業時間:星期二至日12nn-9pm(星期一休息)

回到那些年士多! 陳年滷水+懷舊糖果

舊式商場入面梗唔少得舊式辦館,永利中心商場角落就有間小食檔,位置較靜但超多人幫襯。柴灣地膽話呢間舖已經開咗超過30年,依家由第二代接手,街坊好多就由細食到大,仲係唔少學生哥的蒲點,一到放學時間就會排長龍。小店只賣滷水餸、懷舊零食同雪糕,滷水餸除咗大路的魚蛋腸仔,仲有坊間少見的豬頭肉同浸齋,零食就有好多年冇見過的間尺糖,好似返咗那些年咁呀。

牛丸爽彈,浸齋和腸仔索盡滷水精華,蝦卷彈牙,麵係出前一丁,可揀撈麵或湯麵。一煲有陳年滷汁滾住腸仔魚蛋,滷汁呈深啡色,香噴噴。另一煲就有蘿蔔,滷得入味,蘿蔔帶甜又冇渣。滷水汁鹹得嚟有少少甜味,少少辣,層次好豐富。

切得齊齊整整,咬落煙靭黏口,充滿骨膠原,食完即刻覺得塊臉彈下彈下。

青年商店

地址:柴灣永利中心商場G35(顯示地圖)
電話:2558 8136
營業時間:11:30am-7:30pm

街坊至愛茶記 惹味香茅豬扒

呢間茶記唔算起眼,裝修仲有點舊,但佢係呢區街坊的心頭好之一,午市同下午茶時間經常爆場。入面係普通茶記格局,卡位較多,侍應姐姐快手又有禮貌。香茅豬扒、豬扒包、炸雞髀薯條都係店中名物。

豬扒肉質軟腍,煎得香口,醃得勁入味,香茅味突出又惹味。

雞髀約手掌般大,雞皮勁脆口,油脂甘香,雞肉有些位置嫩滑,有些位置卻炸得過火,粗薯條有口感。

西多士炸得金黃,入口鬆軟帶蛋香,不過入面冇花生醬,有的話就Perfect。

威利華餐廳

地址:柴灣怡順街1-3號宏德居A商場地下28-32,35-37號(顯示地圖)
電話:2558 3104
營業時間:星期一至日6am-6:30pm

最新吃喝玩樂資訊