旺角呃Like 甜品 黃金雀籠Afternoon Tea 【旺角】

唔少人食之前都要幫啲食物影相,upload上FB、IG開心share,而有得睇、有得玩又有得食嘅 甜品 更加係俘擄唔少鍾意「相機食先」嘅巴絲打,呢間法式新派 甜品 店,有唔少有睇頭嘅 甜品 ,仲有個黃金雀籠嘅Afternoon Tea Set,睇落好矜貴,影返幾張相,又成功呃多十幾個Like啦!(好似係)

 

鳥籠三層架Afternoon Tea Set

三層架Afternoon Tea Set 喺香港嚟講唔係新野,但喺打卡界就長期都佔一席位!Tea Set低層有三文治、鬆餅等較飽肚嘅小食、中層係豆腐、朱古力、綠茶三款口味嘅蛋糕、上層係乳酪及朱古力棒棒等甜點,整體嚟講,食物款式都偏向大路,但個金色鳥籠三層架都相當有睇頭,加上用嚟盛載餐茶嘅免仔茶壺都幾得意,加分!

呃LIKE度:★★★★☆

好味度:★★★★☆

精選TEA SET必食推介

成個TEA SET有咁多款野,到底邊樣好食啲?記者揀咗以下係必試嘅四款點心,重點推介。

迷人Pink Lady甜品

除TEA SET外,仲有其他甜品可以呃Like架,呢個「開心」,喺透明玻璃球入面,有一個粉紅色波波,波波其實係馬令(由蛋白及糖製成),建議食法係:先整碎馬令,連埋雪葩、底層配料一齊食,酸酸甜甜又脆脆地咁,口味仲可以自己調節,頂上面有紅、白色醬汁,想食甜啲可以加嘅白朱古力漿,想食酸啲可以加士多啤梨汁。但要$108,開心過後又開始有少少肉痛/_\

呃LIKE度:★★★★☆

好味度:★★★★★

真的憤怒了!嬲到出煙甜品!

呢個叫做「憤怒」嘅甜品,就將64%Valrhona朱古力慕絲整到成個火山咁,中間有紅桑子啫喱,喺「火山口」入面放咗乾冰,一淋上微熱嘅士多啤梨汁,「火山口」就開始冒煙,入面嘅士多啤梨汁都好似溶岩咁起出泡泡,玩味感強,影呢個甜品,最好拍埋片。

 

呃LIKE度:★★★★★

好味度:★★★☆☆

立體花花杯特飲

呢杯特飲其實係野莓Smoothie,入口有好香莓味同乳酪味,味道好似食緊雜莓雪糕咁,幾香甜,但略嫌個沙冰打得唔夠滑,食到少量冰粒。在場都見唔少女士有叫呢杯特飲,杯上面嘅花花好立體,顏色亦都好靚,要提返大家嘅係要叫$89先會跟埋個花花壺,想有齊成set打卡就唔好傻豬豬咁淨係叫一杯啦,無壺跟架。

呃LIKE度:★★★★☆

好味度:★★★☆☆

店內裝修同甜品嘅賣相都幾啱影相,不過喺旺角街舖食個甜品要過百,又有啲唔捨得食,不過呢度係可以叫一個甜品兩份share,同friend一齊食就抵啲。溫馨小提示:店內冷氣比較大,令健碩嘅Cam man哥哥都feel到凍,巴絲們去食野,打記得帶多件外套。

Le Dessert Palais
地址:旺角彌敦道732號寬成樓地下(顯示地圖
營業時間:星期一至日1pm-11pm
聯絡電話:2115 2155

延伸閱讀
$148任食 ! 沙田排長龍 班戟 店放題1.5小時!

最新吃喝玩樂資訊