澳門
澳門

掃街王 | 失傳懷舊冷糕!澳門7大美食推介

飲食

廣告

農曆新年就快到,唔少人都會選擇「過大海」賭一賭,行個大運,但係澳門除咗賭錢之外,仲出名多好嘢食,今次記者Mandy就帶大家遊走澳門同氹仔,失傳懷舊冷糕、地膽推介豬扒麵、著名北海道芝士蛋糕、全港澳首間韓國早餐店,食盡新潮、懷舊美食!順帶一提,今次完全係放蛇式搵食,每樣都係真金白銀買返嚟,賣相同味道都同普通人食到嘅一樣,絕對唔係「記者食嘅特別靚、特別足料、特別好食」。

Part 1:澳門有咩好食

首先帶大家嚟到澳門半島,除咗大三巴、民政總署可以影靚相之外,仲有好多地方可以食好西,即刻為大家介紹5間澳門半島誠意推介!

1. 失傳潮州小食 全澳唯一冷糕店

 

 

作為90後嘅我,冷糕呢個名,聽就聽得多,但係唔好話食,就連見都未見過,今次去到澳門就決定要尋找呢間遠離遊客區嘅傳統食店:吳廷記。冷糕係六、七十年代嘅流行潮州特色小食,但係因為製作工序複雜,所以已經愈來愈少人會整。冷糕嘅讀音比較特別,同潮州「打冷」個「冷」字讀音相同,果然係來自潮州,連讀音都寧舍「潮」。

冷糕食落外脆內軟,有少少似雞蛋仔,但係就更加煙韌,加埋花生碎、砂糖等等,又有少少似格仔餅。新鮮熱辣嘅冷糕,外層直頭脆到好似薯片咁,不過凍咗之後就會開始變韌,所以大家記得趁熱食喇!

唔講唔知,原來冷糕只係秋冬先有得食,因為天氣太熱嘅話,糖就會比較容易融化,冷糕就做唔到咁「企身」,所以只有每年11月至下年5月有得賣。提提大家,農曆新年期間,吳廷記會暫定出售冷糕,改為賣年貨,要初十之後先有得食,我就好好彩咁趕到尾班車。

吳廷記

地址:澳門下環下環街15號地舖(顯示地圖
電話:(+853) 2856 5393
營業時間:星期一至日09:00-17:30

 

2. 地膽推介 關閘文記豬扒麵

位於關閘嘅文記豬扒麵,係記者嘅澳門朋友誠意推介,佢話雖然近年嚟都多咁遊客慕名而來,但係豬扒麵一樣咁有水準。親身試過之後,發現果然冇介紹錯,豬扒整得極香口,雖然好熱氣,不過因為太好食,都要放縱一下。

提提大家,嚟到記得要試埋文記秘製辣椒油,愛辣嘅我簡直食到停唔到口!

文記豬扒麵

地址:關閘廣場新寶花園地下W(顯示地圖
電話:(+853) 2823 0506
營業時間:07:30-17:00(每月1號、11號、21號休息一天)

3.唔駛去韓國都食到!全港澳首間Isaac Toast & Coffee

未去過韓國嘅我,都久仰當地出晒名嘅Isaac Toast,而家終於喺近近哋嘅澳門都有得食喇!相信韓國愛好者對Isaac Toast都唔陌生,好多人都試過為咗呢件三文治而一早起身,最出名嘅火腿芝士吐司,喺明洞分店就已經日售過千份。

網上見過有朋友仔話要排20分鐘隊先有得食,但係我當日就好好彩,一去到就有位,祝各位好運。

Isaac Toast & Coffee

地址:澳門龍嵩正街8D號祐生大廈地下A1座(顯示地圖
電話:(+853) 2832 9993
營業時間:星期二至日8am-8pm

4. 澳門名物 世記咖啡厚蛋多士

香港出名有「厚多士」,澳門都出名有厚蛋多士。世記咖啡外賣店位於大三巴附近嘅小巷盡頭,記者都差d miss咗睇佢唔到。店外長期都排住長龍,無論本地人定遊客都有,有網民話世記咖啡係大三巴附近少數本地人仲會幫襯嘅食店,質素有返咁上下保證。

今次冇揀到豬扒包,反而揀咗咸牛肉,咸牛肉味道啱啱好,唔會太咸,重點係個厚蛋!真係好好味!好好味!好好味!(重要的事要講3次)厚蛋煎得啱啱好,咬開入面仲有蛋漿流出嚟,絕對唔會太老,一個字:無得彈!

除咗多士之外,花生奶油方塊亦係另一推介!雖然近幾年好多地方都有得食類似嘅甜品,但係呢個絕對係我食過最好味嘅奶油方塊,每塊都烘得啱啱好,唔會太淋又唔會太硬,而且花生醬同奶油都十分足料,每啖都會被醬料「漿」住個口,超級邪惡!再加上有花生粒喺表面,口感更加豐富。

叫得世記咖啡,又點少得咖啡呢?呢度嘅咖啡係用炭燒瓦煲煮成,熱飲炭燒味比較濃,變相有d苦,不過可以自己加糖;凍飲就反而有d太甜,記者喺現場都聽到唔少熟客都叫少甜,下次嚟到都會醒目識得叫少甜。

世記咖啡外賣店

地址:新馬路賣草地里7-15號長信大廈地下(顯示地圖
電話:(+853)6377 9664
營業時間:星期一至日11:00-19:00

 

5.新增茶市 抵食順德炸鮮奶

之前都聽過呢間太艮堡陳老太順德料理幾出名,但係一直都覺得價錢有少少貴,所以冇去試。但係今次畀我發現到佢最近推出咗茶市,全單68折!而且大部份主菜單上嘅嘢食茶市都有提供,可以過足口癮。

太艮堡陳老太順德料理

地址:新口岸孫逸仙大馬路澳門漁人碼頭意大利館地下(顯示地圖
電話:(+853)2881 3322
營業時間:星期一至日11:30-03:00 (+1)
茶市時間:11:30-17:00

 

Part 2:氹仔有咩好食

食完澳門半島,當然要去埋一橋之隔嘅氹仔啦,氹仔呢邊比較多新酒店同賭場,當然亦有官也街呢類出名d嘅景點,所以一樣有好嘢食!

6. 新濠影匯食街 獨家分子雪糕包

11月先開幕嘅新濠影匯,酒店入面嘅設施當然夠晒新淨,而且人流唔算太多,行起上嚟好舒服。以本地美食為主嘅「澳門食街遊」,以小食攤檔為主,今次介紹嘅SCIENCE LAB算係當中最受歡迎嘅一間。分子雪糕喺香港已經唔算新鮮,但係澳門相對就比較少,加上將雪糕放喺麵包上面,食落都幾新鮮。而且一月仲有優惠,全單9折!

一見到呢個吞拿魚粟米包就已經想試,吞拿魚味嘅分子雪糕入面加咗粟米粒,口感都幾特別,而且麵包烘過,一冷一熱咁都幾好食!(不過賣相就有少少理想與現實喇…)

SCIENCE LAB

地址:路氹連貫公路新濠影滙購物大道2樓2077號舖(顯示地圖
電話:(+853)63936616
營業時間:星期日至四10:00-23:00;星期五及六10:00-00:00

7. 心穎BB都食!北海道芝士蛋糕Pastry Snaffle’s

北海道出晒名嘅Pastry Snaffle’s輕乳酪蛋糕店,終於開到嚟澳門,連心穎BB都支持!店舖位於官也街附近,十分方便。Catchcake全部由日本空運直送,質素絕對有保證!

提提大家,如果心大心細唔知揀咩味好,可以選擇雙併,價錢一樣,但係可以有兩種口味,都幾friendly。

Pastry Snaffle’s

地址:氹仔舊城區水鴨街15號喜來登廣場地下C座(顯示地圖
電話:(+853)2857 6081
營業時間:星期一至日10:00-22:00

延伸閱讀:
$1,344澳門St. Regis 住豪啲配超貼心管家 |澳門|
黃鴨好忙!2016轉戰澳門
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8

Android:https://play.google.com/store/apps/details?id=com.weekendhk.newsstand2&hl=zh_HK
新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

最新吃喝玩樂資訊