平食宵夜之選! $38位任食 雞煲 @Poortravellers窮遊

呢幾日落雨濕嗒嗒,行過廟街嘅時候都比較冷清,唯獨是有一間食肆特別醒神,離遠已經見到有好多個有蓋摭頂,落雨都唔怕整濕。

行近啲睇,原來係雞煲放題?不得之了,人頭只係$38就有得任食 雞煲(淨係雞煲)。睇睇錶,啱啱好夜晚10點半,即刻同老細講2位 雞煲 。老細問話如果冇訂枱未必有位食,仲話一陣有50個人嚟緊喎!好彩都畀到兩個位嚟啫。

坐低等咗十分鐘度,大約10點40度就拎咗個爐同主角嚟啦!雖然只係嚟食雞煲,之後唔會有得打邊爐,但都有個爐頭畀個雞煲暖住,老細仲話要開住先熟得透。

上咗雞煲就醒目叫多幾個靚仔送飯食,由坐低到食完,老細都冇問過雞煲要咩辣,睇嚟人多係揀唔到辣度。望落個雞煲汁都好濃,食落大約只係微辣至小辣,層次不足,味精有啲重。

每次加雞數量唔算多,至少都加3、4次先夠食。嘢飲另叫,汽水($10/罐)、啤酒($30/支)。雞件雖然唔係勁好味,但以呢個價位,人頭都唔使$50食到個雞煲宵夜,已經非常之咁滿足啦。如果想食,記得早啲打去book位啦。
寶發小廚
地址:油麻地廟街29-35號富昌大廈地下A舖(顯示地圖
營業時間:星期一至日6pm-2am
電話:2882 1707

最新吃喝玩樂資訊