|大圍-掃食行動組|街坊至愛6大平靚正餐廳

除左自助餐放蛇起底組,其實我地仲有掃食行動組!行動宗旨係:瘋狂掃食19區!
今次我地去到大圍。近年大圍成為兩大行業重鎮:飛髮舖同小食店。其中不少深得街坊支持,深得民心的有粥底火鍋、港式碟頭飯、西餐同韓國菜等等。依家、立刻、馬上同你走轉大圍街坊心水餐廳,掃食行動,action!

1. 平靚正海鮮粥底火鍋

開始feel到凍到入心,立刻歎返個粥底火鍋保暖先!最近大圍一間粥底火鍋人氣超高,有咩咁吸引?佢全店淨係推出一個套餐,$198包你7款時令海鮮:蜆、鮑魚、蝦、膏蟹、魚等等,仲有5款自選配料,再加3款指定蔬菜。仲不設加一。唔洗200蚊就可以食咁多新鮮海鮮,好抵呀!

每款海鮮都非常新鮮,海蝦好生猛,仲自己跳入個爐入面!

掃食target:手打雞骨丸、花膠仔

火鍋共有26款自選配料畀你揀,自家製手打雞骨丸同花膠仔係必選!全港獨家首創嘅雞骨丸係由雞軟骨同雞肉造成,味道唔錯,而且雞軟骨令肉丸嘅口感大增!而花膠仔除咗吸收粥水嘅精華,將佢煲多一陣仲會令到你粥嘅味道更加鮮甜!

店內免費提供醬料,有蔥、辣椒、蒜蓉同自製鮮沙薑,記者建議四款醬料撈埋豉油,令海鮮更甜更鮮!
鍋心粥底火鍋
地址:大圍積存街14號地下(顯示地圖
電話:2886 2884
營業時間:6pm-8:30pm, 8:30pm-11pm, 11pm-2am
平均消費: $198/位
備註:免加一,收信用卡,要預先訂座

2. 街坊最愛肉餅飯

有時想食吓港式碟頭飯,呢間大圍老店就啱哂你!從店內裝潢都知呢間茶餐廳已經好耐歷史,平日都有好多街坊嚟幫襯,就算搭枱幾逼都要食!

掃食target:生煎肉餅飯

一定要試最出名嘅生煎肉餅飯!肉餅同飯嘅份量差不多,肉餅仲好厚身,無論點睇都好足料。肉餅煎得十分香脆,食落外酥內嫩,啖啖肉再加埋豉油,用嚟送飯絕配!

掃食target 2:椒鹽豬扒飯

另一推介椒鹽豬扒飯,豬扒份量好多,椒鹽味醃得啱啱好,豬扒本身唔會太乾太硬。

厭d飯太dry可以加埋呢度自制嘅辣菜甫,辣辣地又惹味,值得一試!

食完肉餅飯想返屋企整嚟食,可以外賣生肉餅,畀你點煮都得。$60一盒,攞上手差唔多成斤重,好有份量,有人幫你剁埋醃埋,又抵又方便!

金城茶餐廳
地址:大圍積福街100號(顯示地圖
電話:2602 6351 / 2694 1323
營業時間:6:30am-7pm
平均消費: $50/位
備註:不設加一,只收現金

3. 平價All Day Breakfast

平時食All Day Breakfast都要過百蚊,大圍呢間Cafe Lunch Time去食,$100有找,包嘢飲,仲有甜品送!呢度環境唔錯,裝潢以復古為主,無論坐室外定室內,都覺得非常舒服!

掃食target 1:All Day Breakfast Lunch Set

All Day Breakfast味道雖然不算超好食,但算抵食。Lunch Set包即磨咖啡、蘋果茶或英式茶,忱堆甜品,唔算貴喎!

如果下午茶時段後,All Day Breakfast唔包飲品,貴$12,而Egg Benedict就貴$8,但份量就比Lunch Set大。

掃食target 2:溶

想同朋友hea下傾下計,大圍黎講呢度算幾好feel。可以試下呢杯每日限量供應嘅朱古力,杯上朱古力模以65%比利時朱古力手製而成,由於工序多,每次只製60個,平均每日只供應5杯。用Espresso shot,倒喺朱古力模上面,朱古力融咗之後再搞勻,變得又甜又滑,好玩又好飲!

梳乎厘咖啡其實係泡沫咖啡,喺泡泡上面灑咗糖同棉花糖,再用火槍燒一燒,飲落真係有d似梳乎厘嘅感覺!

古朴年代咖啡.酒館
地址:大圍積福街72號地下D舖(顯示地圖
電話:2613 0544
營業時間:星期一至四12:15pm-22:30pm;星期五至日12:15pm-12am
平均消費: $130/位
備註:收信用卡,星期五、公眾假期前夕6:00pm後,星期六、日及公眾假期設加一

4. 韓仔Oppa為你炒溶岩飯

近年韓風吹襲,唔少人都鍾意韓國芝士食物,估唔到係大圍屋邨都有韓國餐廳!
店內竟然有唔少店員係韓國人!而好似漢拿山芝士蛋溶岩豚肉炒飯、火焰芝士拉豬仔骨、春川辛辣炒雞煲及亞之媽街頭炒豬什錦等等,都由Oppa係你面前開爐煮畀你食。

除咗見到眼前嘅美食,本人承認,忍唔住偷望咗Oppa幾眼添。

掃食target :芝士蛋溶岩豚肉炒飯

芝士蛋溶岩豚肉炒飯有得揀辣定唔辣,Oppa將個蛋煎得啱啱好,隻蛋仲有少少蛋漿加埋芝士超match超好食!(心心眼!)而個飯除咗用豚肉同燒汁、仲有洋葱、蘿葡絲同紫菜去炒,炒完有少少飯焦,好香好惹味,但豚肉份量唔算太多。

純呃like target:芝士拉豬仔骨

Oppa煮芝士拉豬仔骨嘅時侯已經「芝」香撲鼻,當見到咁大嚿芝士,真係好吸引,但點知豬仔骨嘅味道普普通通,冇乜特別。

部隊辛辣麵蛋邊鍋 $128

菠蘿冰係原個菠蘿起肉,再打成沙冰倒回菠蘿殼中,味道清酸天然!

Sister Korea Cafe
地址:大圍翠田街2號新翠商場地下17,18 &18A號舖 (顯示地圖
電話:2596 0018
營業時間:11:30am-11pm
平均消費: $150/位
備註:設加一,只收現金

5. 性價比高之德國豬手

想同一大班friend食西餐,受價錢所限都係食返快餐。下次可以試呢間街坊推介、性價比超高嘅西餐廳,有德國鹹豬手、啤酒燒春雞、德國腸拼盤、及生蠔等食物畀你揀,抵食夾大件!只要你惠顧食品,場內飲品仲任飲任斟,仲唔收加一,每位消費約$150左右,原來食西餐都可以好平!

掃食target 1:德國啤酒咸豬手
咸豬手大大份,仲切埋方便你食。豬皮炸到脆卜卜,肉質夠爽口,有薯條同沙律做配菜,抵食!

掃食target 2:西班牙墨汁魷魚筒燴飯

墨汁魷魚筒燴飯唔係度度都有!魷魚好煙韌,但唔會好似擦子膠咁,加埋燴飯,口感一流!

食店最近更推出咗美國生蠔,有泰勒石蠔($19/隻)、太平洋石蠔($26/隻)同超大珍寶蠔($39/隻)。泰勒石蠔海水味淡D,幾清甜;太平洋石蠔海水味濃,肉質偏甜;而超大珍寶蠔海水味淡,肉厚夠份量!

下午茶提供30多款小食,平貴都有,定價$21至$50左右。想食飽d,可以揀米蘭肉醬12吋長熱狗,而且飲品任飲,飲到夠皮為止!

Cafe 1950歐陸餐廳
地址:大圍美林商場1樓 (顯示地圖
電話:2866 1909
營業時間:7am-11pm
平均消費: $150/位
備註:不設加一,只收現金

6. 秘製櫻花蝦炸醬腸粉

大圍積富街有間隱世小食店,當中有個超厲害嘅腸粉 ─ 櫻花蝦炸醬腸粉!店主自行研發港式炸醬,再配上大量的蝦乾。除此之外,仲有另一名物咖哩腸粉!

掃食target:小蝦米炸醬腸粉

據女店員所講,呢個$12蚊櫻花蝦炸醬腸粉,小蝦米其實係來自汕頭一帶,所以應該就唔係日本或者台灣嘅櫻花蝦,而係汕頭小蝦米。不過蝦乾買番嚟之後再自己烘炒,配合自家製炸醬,雖然自稱「台式炸醬」,但味道明顯無咁濃,肉味又相對小,但豬肉味濃,醬汁也調較得惹味!而且配合大量蝦乾同惹花,咸香味十足,加埋底層嘅麻醬同豉油,好好味呀!

大大勺蝦米放在炸醬上面,蝦米仔經過自家烘煎,勁香!

除咗小蝦米炸醬腸粉,仲有咖喱汁腸粉,只係賣$6蚊!咖喱汁超級濃郁,似日式咖喱,但味道上就非常港式,雖然汁料只有洋蔥做配料,但咖喱味夠鹹而香,濃度醬汁配腸粉堅好味!

盛昌美食
地址:大圍積富街喜悅樓地下(顯示地圖
營業時間:10am – 12am
平均消費: $20以下/位
備註:只收現金
延伸閱讀:
|18區掃食|地膽推介 黃大仙 7大抵食小店
|掃街王|九龍東小葵廣!藍田5大街坊美食

最新吃喝玩樂資訊