【必吃粵菜】蛇王芬沙田再開新店！四季芬芳招牌燉湯 花膠太史烏雞絲羹 奄仔蟹土魷肉餅煲仔飯｜區區搵食
撰文：胡蚊 攝影：Tony
蛇羹老字號 蛇王芬沙田開副線
四季芬芳主打養生燉品 助抗疫
中環蛇羹老字號蛇王芬，見證住香港近七、八十年高低起落。向來以招牌蛇羹、臘味飯為招徠，當年沙士，人人聞蛇色變，生意直插谷底，得第四代傳人吳煋姿 Gigi 想出用足料燉湯、家常小炒，逆市求生。十幾年過去，今次新冠肺炎來勢洶洶，飲食業重創，做開中環白領生意，營業額下跌近半，老店是時候再出招。選了沙田新城市廣場，看中中產家庭的消費力。
做法和太史五蛇羹一樣，棄用蛇湯蛇絲，改以雞湯及竹絲 雞絲，鮮味不變，一樣滋補，適合不吃蛇的朋友。
新店以海藍配大紅為主調，天花畫上彩繪牡丹及小靈蛇，帶中式優雅之餘，又暗藏老店的蛇王元素。中午主力做燉湯、湯麵、兩餸飯等簡餐，自家製黑毛豬脢頭叉燒配膶腸飯， 加明火例湯，大大碗，有飯有湯，才$68，很抵食！晚市就精緻多，中環的撚手小菜，比如子薑麵醬魚腩煲、滑蛋大蝦、魚蓉蛋角等，都可以在新店找到。
叉燒是用西班牙栗飼黑豚自家焗製，指明用脢頭， 肉質腍滑，有咬口，與招牌膶腸勁夾，連明火例湯才 $68，抵!
招牌滋補燉湯+秘製煲仔飯
店內另有9款招牌燉湯：海底椰雪梨豬𦟌止咳潤肺、冬瓜瑤柱響螺鮮甜滋補、 白菜膽陳腎養陰清肺熱；都是三分料七分湯，燉至少3小時而成，七、八十蚊有交易，計起來，平過自己燉。店中另一焦點是煲仔飯，共6款：溫泉蛋和牛肉餅，非常 juicy；金蠔臘味，蠔香陣陣，很惹味。重頭戲是奄仔蟹土魷肉餅煲，打開見到原隻鮮味奄仔很有霸氣，最厲害是全部煲仔飯都可以要求加玫瑰露做成火焰效果，打卡之餘，可令飯底加點醉人酒香。
煲仔飯食得多，原隻奄仔蟹上，感覺非常豪。蟹的鮮味在煮飯時滲入飯中，臨吃時可加玫瑰露點上一把火，揮發點酒香，好看極了。啖啖鮮的蟹肉，配香嫩土魷肉餅，和店家與同珍合作的限定煲仔飯醬油，飯粒油潤煙韌，飯底焦香脆口。
打開蓋已經聞到酸香撲鼻，用上自家醃製一星期的子薑， 配合九龍醬園原粒麵豉醬，鯇魚腩肥美肉厚，炸過更是香口，與酸咪咪的醬料配搭，添飯，唔該。
竹絲雞和水鴨同樣滋補，燉足3小時，為免影響賣相，上枱前大廚會另備湯料鋪在湯面，不怕湯渣熔掉。
煲仔飯所用的醬油，亦是老闆和大廚反覆測試再交予本地醬園同珍製作，帶點點蠔油香氣，濃稠適中，味道偏甜。既名蛇王芬，蛇固然是主角，可惜在新冠肺炎陰影下，野味成了敏感詞，有見及此，大廚特地用同樣滋陰的竹絲雞代替蛇肉，炮製多款傳統「蛇」菜。不得不提，一定是蛇羹。蛇王芬的太史五蛇羹傳承自江太史家廚，做法正宗。今次大廚將蛇骨湯改為雞清湯，而蛇絲就改為竹絲雞絲，其他配料好似花膠絲、冬菇絲、果皮絲、木耳絲等都保留不變，繼續熬足4個鐘，湯頭清澈鮮味，再勾上薄芡，味道同蛇羹沒大分別，同樣滋補，不吃蛇的朋友，可能一試愛上。
老店用蛇湯釀入蝦丸中，新店改以竹絲雞湯，將雞湯雪成啫喱狀，釀入蝦丸內炸香，臨吃時唧上黑醋，既可調味，又可降低流心湯汁的溫度，不怕辣口。
靈感來自點心芋角，製法一樣， 但內餡加了惹味鹹蛋黃、彈牙帶子及酥香肉鬆，一啖有齊酥、 香、脆、彈的口感，不油不膩。
(左起)桃膠菊花桂花雪梨茶、竹蔗茅根馬蹄薏米水、石榴紫貝天葵山楂蜜、黑糖三棗桂圓薑母茶，都是自家製作，不會太甜，健康養生。
四季芬芳
地址：沙田正街2-8號新城市廣場第三期3樓 A363號舖（顯示地圖）
電話：3108 2187
營業時間：星期一至日 11:30am-3:30pm、5:30pm-9:30pm
人均消費:$180
備註：設加一，收信用卡
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
