十字牌牛奶 主題冰室 軟雪糕+燉奶+芒果木瓜奶麥皮 I西營盤食乜好I
撰文：Joan 攝影：Tommy佬
十字牌牛奶 軟雪糕＋燉奶＋奶昔8款推介
餐廳雖叫十字冰室，但並不是由十字牌牛奶所開，只是冰室和十字牌牛奶合作。食物方面，有冰室常見的常餐、三文治、西多、通粉和炸髀等小食，不過種類較傳統冰室少，當中炒滑蛋、麥皮、燉奶、奶昔和軟雪糕都加入了十字牌牛奶，吃時會有一陣熟悉的牛奶香味啊！同時亦加入新元素，有軟雪糕、all day breakfast、黑松露炒蛋和韓式辛辣麵，幾搞鬼。不過餐廳都是試業階段，食物和價錢有機會再調整。
意大利雪糕粉加十字牌牛奶，一入口即食到香濃奶味，而且較一般雪糕滑身，想食的要12:00nn後去啊！而之後十字牌如有新口味的牛奶，都會用該產品製作特別口味的雪糕！
奶昔用了雪糕、十字牌牛奶、椒鹽脆餅攪拌而成，杯邊擠滿了焦糖醬，味道不太甜，好重奶香，還啜到脆餅碎。除了雲呢拿外，還有朱古力和士多啤梨味。
有凍、熱燉奶，一吃便知加了十字牌牛奶，入口好滑溜，奶味濃得來帶微甜，4:00pm後才供應啊！
好特別的配搭，麥皮加了十字牌芒果木瓜奶，再加上新鮮木瓜粒，食落較平時牛奶麥皮清新，木瓜甜味較出。記着放得久會變稠啊，要快點吃！
當然亦有十字牌鮮奶啦！市面已沒有玻璃鮮奶，冰室特地訂了玻璃樽，再把牛奶倒進樽內，其他地方都冇啦！
西多亦有新搞作，除花生醬外，亦有流心芝士西多和Nutella西多，Mozzarella和Cheddar芝士分量足，西多亦較厚身，好飽肚。
皇牌餐有番茄牛尾湯通粉、黑松露炒滑蛋和牛油方包，番茄牛尾湯底用原條牛尾、番茄和蘿蔔粒熬煮4-5小時，酸酸甜甜幾開胃。
烘熱了的菠蘿包夾着半熟煎蛋和火腿，食時要小心，一咬，蛋黃就會湧出。
霓虹招牌 懷舊風設計
餐廳設計懷舊得來帶點型格，門口有霓虹招牌，牆上有手寫餐牌、鐵閘、仿紙皮石地板、一面貼滿街招的牆，又有較現代的手繪壁畫和吊墜燈，幾多位可以影靚相打卡。
一邊手繪壁畫，一邊是手寫餐牌，舖面一眼睇晒，行入少少還有兩個卡座。
手寫和貼牆換牌式餐牌，是舊冰室、茶餐廳的風格。
手繪壁畫靈感來自沖奶茶，像不像撞茶時，奶和茶混合的瞬間？
洗手間在鐵閘門後，旁邊牆身貼滿半撕爛的街招，又造得幾似。
