元朗YOHO MALL大型Food Court正式開幕！直擊9,000呎美食廣場＋人氣街坊食店｜區區搵食
元朗街坊有福啦！首個大型美食廣場Food Court 「Foodeli」正式登陸YOHO MALL！全場佔地9,000多呎，多達12間掃街小食店進駐，包括元朗街坊小店、中日韓泰菜式等，想食咩都有，記者為你現場直擊，睇下有咩最吸引！
撰文：Sakura 攝影：Cliff
元朗YOHO MALL 9,000呎美食廣場！
元朗街坊注意！首個大型美食廣場Foodeli終於開幕啦！ 更設於元朗最大型商場YOHO MALL，全場佔地9,000多呎，場內有12間掃街小食店進駐，提供各式各樣街頭小食，如元朗街坊小店，各地菜式包括中、日、韓、泰等，場內更設有掃碼點餐，客人可以即時點選指定餐廳，再柯打菜式，然後再以八達通付款就完成，相當方便。以後街坊又多一個掃街好去處啦！
Food Court記者精選5大餐廳逐間睇！
1.Bove 梳乎厘班戟小店
在葵芳、旺角等地區都設分店的人氣甜品小食店Bove，主打梳乎厘班戟， 即叫即做，蛋味香濃，食落口感軟綿，另外還有特色雞蛋仔，味道有趣，如阿華田脆脆、抹茶麻糬、羅宋湯等，咬落味道香脆，口感豐富。
鬆軟梳乎理班戟配上士多啤梨朱古力餡，味道香甜。
咬落香脆，有好多阿華田脆脆，味道濃香。
2.阪神 日式大阪燒＋章魚燒
阪神主打各款大阪燒、章魚燒、日式炒麵等日本美食。當中推介招牌章魚大阪燒，餡料豐富，配上濃厚醬汁和柴魚片，口感層次突出，惹味十足！另外章魚小丸子粒粒飽滿，十分足料。
粒粒脹卜卜，相當足料！
配上濃厚醬汁和柴魚片，外脆內軟，惹味十足。
3.元朗燒賣皇后街坊人龍店
相信大家都對燒賣皇后不陌生，元朗燒賣皇后是三十年街坊店， 堅持自家製作，主打多款街頭小食如燒賣、魚蛋、生菜魚肉等，其中最著名就是香菇豬肉燒賣，選用新鮮豬腩肉混上手打鯪魚肉，再配上冬菇，豬肉彈牙，口感爽滑！
燒賣粒粒爽口彈牙，食落很香。
4.三多炸髀 極香脆生炸雞髀
三多是元朗人氣小食店之一，主打即叫即炸大雞髀，保證熱辣辣，雞脾香脆鬆軟，咬落爆汁，有成塊面咁大，很惹味！
咬落勁香脆，食落雞肉算滑身。
5.泰麵膳 主打泰式船麵
最近人氣大熱的泰式船麵，在Food court都有得食！泰麵膳代表作就是安格斯牛肉船麵，以安格斯牛肉配以八角，荳蔻， 胡椒，花椒等等正宗泰國香料餚製的湯底，入口濃郁，牛肉嫩滑，充滿地道風味！
麵條爽彈，湯底很入味，配上嫩滑安格斯牛肉，勁正！
