伊呂波隆重回歸體驗飛驒牛十部位

日本燒肉店喺香港選擇眾多，但定位各異，有啲會以平實價錢做招倈，部分就以高檔講究做賣點。如果想搵一間近期性價比最高嘅代表，Dining娜會推介「肉料理廣」，皆因餐廳最近推出咗一個非常吸引抵食嘅2人精選套餐，只要$1,180就可以一次過食均A5飛驒牛10個唔同部位！仲可以品嘗到有40年豐富經驗同技術嘅日藉總廚山本一郎，利用精湛刀功為A5飛驒牛切割出完美紋路，同時又保留咗唔同部位嘅獨特風味！A5飛驒牛每日由日本新鮮空運到港，每一件都脂肪分佈平均，霜降油花入口即溶，肉質軟嫩，只需要少量海鹽調味，待輕炙後再佐以秘製醬汁食用，就可以品嘗到A5飛驒牛最極致細膩嘅味道同質感！

今次推介嘅2人精選套餐，由日藉總廚山本一郎喺成隻A5飛驒牛28個唔同切割部位裡頭，精選出10個唔同部位：西冷、肉眼芯、里脊肉、上後腰脊肉、臂骨肉、和尚頭、亀之子同友三角，共16件日本直送黑毛和牛肉，俾大家慢慢細味！每個部位從油花分佈、筋肉質感、肉味濃度，以至切割厚薄都各有特色。好似里脊肉係牛背最嫩滑嘅瘦肉部分，雖然油花較少，但相對油膩感亦較輕。而臂骨肉因為係骨邊肉，牛味濃郁，稍為輕炙即可食用。屬於牛前胸部位嘅友三角，油花十足且分佈勻均，只要輕燒幾吓已脂香四溢。同樣係雪花較多又富肉味嘅肉眼芯（無錯，總廚細緻到就算肉眼部位，都要再精準分成肉眼芯、肉眼頂同肉眼卷等精細部位），唔單止無筋滑嫩，仲要入口即溶，令人食完小確幸心情油然而生。

每個部位都會附上由日藉總廚命名嘅名牌介紹，夠晒細心。

由於今次食用嘅飛驒牛係經14個月以上高海拔天然養殖，屬最頂級A5品質，所以基本上唔駛任何醃製調味，簡單灑上少少海鹽提鮮，已經可以食到飛驒牛超豐富嘅肉味、油花同質感。不過，餐廳都會附上清新檸檬汁同秘製醬汁，俾大家點醮嚟食。負責人期間俾大家一個燒肉小貼士，就係先將飛驒牛反覆喺網面輕拖兩吓，等牛油沾喺網面上避免黐底，再將肉放喺網邊輕輕燒炙就得啦！由於網中央火勢較猛，最好放啲比較難熟嘅食物，好似野菜同牛以外嘅其他肉類。

飛驒牛肉質上乘，輕燒數下肉面已見吸引網紋。

由於「肉料理廣」主打肉料理，所以今次套餐除咗有主角A5飛驒牛燒肉之外，仲會有埋4件灸燒A5飛驒牛握壽司，包括2件灸燒赤身 A5飛驒牛壽司（外側後腿肉），同埋2件灸燒霜降 A5飛驒牛壽司（下肩胛翼板肉－稀少部份）。軟糯嘅珍珠米沾滿咗和牛油香，夾雜住肉脂各半嘅油肉層次，叫人回味。套餐同時送埋2人份量嘅野菜拼盤、麵豉湯、漬物、茶碗蒸及白飯。好味飽肚同時亦唔會有滯膩感。

和牛壽司味道同樣有驚喜！

肉料理廣喺5月仲會推出呢個只要$780，就可以食均西冷、臀骨肉、牛肩肉、里脊肉，同埋上後腰脊肉，多位部位嘅「A5飛驒牛拼盤」！

秘製小壺漬小牛排＄210，同餐廳一齊經歷過十幾年風風雨雨，亦係呢度長期必點皇牌。

日本和牛向來被視為國寶級食材，而飛驒牛、宮崎牛同神戶牛，就並稱為日本三大和牛，其中飛驒牛由於品種純正，加上生長喺5,000米以上嘅高海拔純淨山上，所以連續三屆獲得「全國和牛能力共進會」（別稱「和牛奧林匹克」）最優秀食用牛肉獎，更被譽為「和牛之王」！而上年開業嘅「肉料理廣」，前身其實係燒肉店「伊呂波」，由於後者想由只賣燒肉嘅市場定位，轉走更加全面嘅肉料理路線，所以早前再翻新全店，又請嚟有廿幾年豐富日料理經驗嘅「伊呂波」總廚山本一郎坐鎮，品質絕對有高度保證！