複製阿元? 港人主理台味茶記【旺角食乜好】

有台灣朋友同筆者呻，香港少有似樣 台灣小吃 ，要吃得老遠殺入西環搵 阿元 。不過，最近有間港人主理的台灣料理開張，聽聞店主曾赴台取經，即去試！店內雖以台式懷舊海報粉飾，格局卻走唔甩茶記味。先試紅燒牛肉麵，藥材味撲鼻，湯頭清爽，略嫌少了牛油香，似清燉多過紅燒。至於牛肉燜得夠腍，夠入味，拍得住台灣過江龍出品。最好倒是滷肉飯，肉丁有肥有瘦，脂香芳郁，入口即化，甜甜滷汁滲入分明黏韌的珍珠米，味美不遜台北夜市。同枱還試了鹽酥雞、炸豆腐、綜合滷味，雖談不上重現古早味，不過以香港標準，除咗鹹啲之外，合格有餘！