相機食先！旺角靚裝~懷舊茶餐廳 朝早食炸髀撈丁＋阿華田脆脆西多 夜晚開枱食火鍋放題！｜旺角食乜好

記者：Joan 攝影：Woody

環境行先！ 靚裝懷舊茶餐廳：戲院主題

餐廳雖在一樓，但離遠已經見到有大大張的卡通版電影招牌，睇真啲，細字正是介紹著冰室內的食物，「肉丸人」、「誤入肥牛地頭」，電影人物全配上搞鬼名字，好有諗頭！餐廳的主題是戲院，門口位是戲院買票位置，有多張卡通電影海報，同樣在介紹招牌食物，非常繽紛，未入門口已有好多打卡位！

走上一樓，已有一排火水爐列於眼前，收銀處有部老舊收銀機，牆上有當舖的「押」字、「夜總會」招牌，又有鮮艷的壁畫，原來店內各式各樣的懷舊傢俬和擺設，都是店主在夜冷店尋寶或請求朋友讓給他的，都是六、七十年代的產物，又播著許冠傑的經典歌曲，好有懷舊Feel！

下午供應茶記食物：三蛋叉燒飯＋阿華田脆脆西多

冰室供應的食物早晚不同，12nn-4:30pm會供應各款茶記食物，例如碟頭飯、撈丁、炸髀和鮮油菠蘿包等，選擇有近60多款，但款式也有新意思，例如下午茶常吃的西多士，兩塊麵包夾著花生醬炸到香口，面頭再放厚牛油及灑上大量阿華田脆脆，甜食控Don’t Miss！飲品也有多款懷舊選擇，包括黑牛、白牛、唂咕和滾水蛋等。

晚市供應：火鍋套餐 手切本地肥牛油花多

一到6pm，餐廳每張枱便會放石油氣爐，搖身一變成火鍋店，連音樂也會轉播較Chill的Pop Music！火鍋套餐每位$308，前菜小食可任食，有麻辣青瓜、蒜蓉木耳和炸片頭，更會送一份鮑魚，但記住要留肚，不要吃太多！因每枱會有一份雞煲，食完可以換爐吃火鍋放題，每枱跟人頭數量的海鮮、手切本地肥牛、手切西班牙黑豚豬，任食火鍋料有響鈴、魚皮、各款丸類、餃子、蔬菜和麵類，食足2.5小時！汽水每人一罐，追加每罐$14或可以$38/位無限添飲凍檸茶，不過餐廳尚未領取酒牌，暫時未有啤酒供應。糖水跟一大碗雜果涼粉紅豆冰，勁懷舊！

火鍋分兩輪入座，第一輪是6pm-8:30pm，第二輪是8:30pm-11pm，切記晚市不會供應茶記食物，不要摸門釘！

火水爐

地址：旺角煙廠街33號朗廷軒1/F（顯示地圖）
電話：2663 1087
營業時間：12nn-4:30pm（只供應茶餐廳食物）、6pm-11pm（只供應火鍋）
火鍋套餐收費（兩位起）：$308／位，另收加一
火鍋用餐時間2.5小時，分兩輪入座，第一輪：6pm-8:30pm、第二輪：8:30pm-11pm，建議先訂座

延伸閱讀：