【自助餐放蛇起底組】買一送一 美國菜放題 ！$99位任食10吋炸魚+juicy牛肉漢堡
撰文、攝影：放蛇組
美國菜放題：水牛城雞翼＋肉串＋烤菇3pm已經無得食
任點任食只限12nn-5pm，60分鐘內可任飲任食。選擇有頭盤、小食、主菜和飲品，細睇其實都好豐富，不過記者3pm入座，店員便告之雞翼、肉串和烤茹已售罄，本來打算喪食雞翼的記者超級失望！即是非主菜類的食物只得薯條、薯角、炸魚和沙律。炸魚一上枱，嘩！不禁眼前一亮，精神返晒來！因為炸魚超巨型，拿呎出來度一度，足足有10吋長！超香口，魚肉濕潤多汁，唔腥！質素甚高，這個價錢簡直超值！
沒有雞翼、肉串和烤茹，唯有轉戰炸魚薯條、Pizza和漢堡！
飲品最快上枱，有紅豆奶茶和蜂蜜檸檬水等選擇。
炸魚薯條一上枱，不禁驚嘆叫出聲！上枱的是超巨大size，是炸魚巨艦，足足有10吋般長！而且是剛剛炸好，超熱辣辣，一切下去勁脆，魚肉夠濕潤無腥味，而且超滑。
拎把尺出嚟度一度，有10吋長，隻碟都放唔落啦……
close up畀大家望望，真係有10吋！
小食：熱溶芝士薯條＋香煎辣肉腸配薯餅
之後有熱溶芝士薯條，一上枱仍然拉到絲，薯條偏腍身，只落了少少鹽調味，所以薯條都是非常純粹的薯仔味道，但是芝士不夠多，食到一半味道有點寡。另外亦點了香煎辣肉腸配薯餅，相比之下賣相比前兩款平實，但是辣肉一切下去先juicy到爆汁，薯餅亦炸得香脆，都可以一試。
熱溶芝士薯條芝士不夠多，未能將全部薯條蘸滿。
香煎辣肉腸配薯餅相對下無咁邪惡，但辣肉腸juicy飽滿，煎得好香口。
反而煙三文魚沙律等了25分鐘才到，而且大廚似倒瀉沙律醬，整碗菜都沾得太多醬，好濕！
主菜：必食juicy美國牛肉漢堡
主菜方面選了美國牛肉漢堡、美式辣肉腸薄餅和黑松露雜菌扁意粉，全部都是正常份量size，最好食的是漢堡，漢堡包有用牛油煎香，裡面夾了兩大塊煙肉、半融芝士、牛肉、番茄和生菜，好豐富！一分為二切開時都有點難度，牛肉夠厚，肉汁juicy有口感，而且帶陣燻香，煙肉亦夠鹹香，必食！另外的美式辣肉腸薄餅是8吋，批底亦是厚批，塗了番茄醬，topping有辣肉腸、番茄片、芝士和青椒，整個批都是酸甜的番茄味為主，不愛吃番茄的可以skip。
必食的美國牛肉漢堡，牛肉煎得剛剛好，帶陣陣燻香，配埋鹹香煙肉，正！
Pizza是正常8吋size，兩個人食真係超飽！
醬底是番茄，面頭又有番茄片，不愛吃番茄的千萬別點。
黑松露雜菌扁意粉，目測不見黑松露，也聞不到，只是食到很多雜菌和洋葱，醬汁較淡，而且意粉不太掛汁。
總結：選擇方面有小食、沙律、Pizza、漢堡、意粉等，原本都幾豐富，不過可惜3pm已賣完雞翼、烤菇和肉串，簡直大打折扣！無雞翼食超失望！食物份量無因為任食而減少，都是正常size，最好食同最吸引的一定是炸魚薯條，其次是漢堡，而其他都正常。價錢方面$198，買一送一後只是$99位，超抵！不過60分鐘有少少趕，2個人食會非常飽，叫多啲朋友一齊開心share就最好！不過優惠只限平日，而且必需預約，但放蛇期間電話響過不停都沒有店員接聽，而walk in又要等後備位，所以要食到的話…要祝大家好運啦！
一句到尾：齋食炸魚已經回本！
New York Diner
地址：銅鑼灣軒尼詩道523-527號澳門逸園中心2樓(顯示地圖)
電話：3543 0218
任點任食供應時間：星期一至五 12nn-5pm
收費：$198位(買一送一後$99位)
用餐時間：1小時
備註：收加一，優惠到12月16日
*更新：餐廳訂座已滿，只剩walk in後補位置*
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
