太子食乜好 隱世小店有機健康餐廳 —— 主打無味精、無雞粉、無激素

香港人出名識食愛嘗鮮，除咗海鮮肉類講究新鮮同產地之外，近年更對本地農場直送嘅新鮮有機蔬果愛不釋手，而大隱隱於熱鬧太子花墟嘅「漫活堂」，可以話係同區少見會不定期提供本地Farm to Table菜嘅新派有機餐廳，部份菜式更會聯乘本地產品供應商，加入香港製造元素，支持本地產業。

（Present by漫活堂）

本地有機蔬果入饌

一踏入「漫活堂」就見到餐廳周圍貼有「無味精、無雞粉、無激素、有機、健康」5大食材特色，貼心提醒忙碌嘅都市人，唔好忘記由飲食方面著手注意健康。材料方面，部份蔬菜會從自家本地農場直送到廚房，午市餐單同晚市餐單亦會按季節時令，分別每兩星期同三個月更新一次，俾到大家新鮮感之餘，亦食到當季食材最豐富嘅營養。餐廳角落仲設有魚菜共生系統，等大家可以邊欣賞魚樂，邊嘆健康美食。

餐廳嘅海鮮同肉類都會採用外國有機或天然認證，確保品質優良同來源安全，好似有用無抗生素同激素嘅天然走地雞及法國黃油春雞；喺橡樹林最少放養 18個月，食橡子果、香草同橄欖長大嘅西班牙伊比利Bellota橡果級（國寶級）豬肉；百分百天然殼物飼養嘅美國天然豬，同埋較軟滑多汁既澳洲和牛；喺北極圈生長嘅挪威刺身級三文魚；緬甸野生捕獲優質海蝦；仲有按回教律法屠宰嘅新西蘭AFFCCO羊肉等！連串認證唔單止俾到大家食安信心，亦代表一眾食材擁有出眾嘅味道同質感！

餐廳門口設有專賣架出售有機健康食品。

為迎接炎夏，以下全新菜式將會喺5月11號開始推出：

“醒胃”油甘魚薄片配青芥辣沙巴翁(晚) $108

鮮嫩嘅油甘魚片，配以酸辣醒神嘅醬汁，清新開胃，係今夏必點前菜。

流心芝士番茄沙律配本地「原居文化」陳皮南棗釀(晚市) $78

番茄同水牛芝士沙律夠晒輕宜醒胃，佐以香醇突出嘅本地陳皮南棗釀醬汁，變成一道特色地道香港美食。

皇帝蟹腳配咸蛋黃忌廉汁，老字號蝦子麵(晚) $328/ set

呢道菜結合咗中、西、日嘅煮法！皇帝蟹腳鮮甜多肉，而香港老字號蝦子麵分別以煮同炸嘅方法呈現，再灑上惹味咸蛋粒增香提鮮。

「漫」煮美國天然鴨胸配血橙汁(晚市) $258

專為夏天設計嘅新菜式，慢煮鴨肉細嫩入味，仲用咗更香、更多營養嘅血橙製成果醬汁，減去肉類嘅濃膩感。

野捕海蝦夜行堡 (下午茶）$98/ set

野捕海蝦爽甜多肉，以多甜微酸嘅菠蘿同微辣沙律醬調味，配埋本地新鮮沙律，屬份量十足嘅下午茶美食。

意式馬鈴薯糰子配黑松露醬(晚市) $158

夏日創意新菜，將馬鈴薯搓成可愛糰子形狀，拌以香味濃郁嘅黑松露醬，味道獨特出眾。

(左) 牛油炒自家農場菜苗 $48。 (右)自家製菜苗餃配菇清湯 (下午餐) $68

採用自家農場種植之「微菜苗」，唔單止絕無添加農藥，而且營養價值比一般蔬菜高，健康之餘又食得安心。菜苗餃中的豬肉更用上本地農場黑毛豬，特別惹味多汁。

「漫」煮黑啤燴澳洲和牛牛面肉(晚市) $268

長期皇牌產品之一！呢款係改良版，透過低溫慢煮令本身已經軟滑嘅和牛，更加入口即溶，比以前保留咗更多軟彈質感。底部配以薯蓉同黑啤汁，再用女士們至愛嘅Le Creuset盛載，實屬值回票價之選！

保加利亞有機玫瑰花減糖雪糕 $28/球 ，$38/兩球

全港獨家味道，以保加利亞有機玫瑰花焗成花水，再加入北海道牛奶製成香滑細膩嘅少甜雪糕。

營養餐：減壓、醒神、美肌、排毒

「漫活堂」最近仲與本地營養師合作，設計咗一系列低卡有營、少鹽少油嘅營養餐，仲特別分為「減壓、醒神、美肌、排毒」4款特色功效同口味。每款餐單都低過500卡路里，絕對適合離緊夏天需要Keep fit嘅一眾女士們。營養餐踏入6月就會推出啦！詳情可留意「漫活堂」嘅Facebook或網頁。

營養餐：「漫」煮鮮三文魚配紫薯球（>500卡路里）$138

集鹹甜酸鮮多種滋味同均衡營養於一身，更適合老友記同小朋友食用。

餐廳角落仲設有售賣架，陳列好多本地同世界各地有機及公平貿易嘅產品，等大家嘆完美食覺得好味，仲可以即時買返屋企。

由緬甸NGO主理嘅天然純蜂蜜($100)，唔單止通過國際級化驗，仲可以支持幫助到當地婦女自力更生，擔起社會責任。

餐廳好支持本地社企同弱勢社群，特設寄賣區售賣各類NGO作品。

逢星期六上晝，餐廳仲會邀請心光盲人院暨學校到店表演。大家不妨搵個周末嚟支持下佢哋，為學員打打氣。

後記：雖然有人會覺得「漫活堂」定價比一般西餐廳稍貴，但真心講句一分錢一分貨，要食到同樣三無、有機、有認證，仲可以慢慢坐嘅高質餐廳，喺成本高企環境吓仍然生存到嘅小店絕對需要支持一下！訪問當日仲發現餐廳會要求員工定期試食自己煮嘅菜式，睇得出廚師們同公司都希望帶到優質食品俾大家享受， 絕對值回票價！其實好多明星都有嚟幫襯，就睇吓大家下次有無機會喺餐廳撞到平民特首啦！

漫活堂

地址：九龍太子道西214號地下(花墟內、鄰近火車橋)

電話：2687 0866

網址：slowlife.hk

開放時間：

午餐：星期一至五12:00-15:00

下午茶：星期一至五15:00-17:30

晚餐：星期一至日18:00-22:00(21:30 last order)

星期六、日及公眾假期：11:30-17:30，特設brunch set