$20 即開海膽 西貢海邊新鮮直送

即開海膽 又抵食又新鮮

負責人話，出售嘅海膽來自來塔門，由而家起至5月都會有，每日新鮮捕捉。海膽全部即叫即開，想即食又得，拎返屋企加工再食又得，不過就建議大家即使冷藏都好，最多保存到第2日就好食喇。

想讚返，負責人每開一隻海膽都會睇清楚質素先畀客人，以記者今次為例，有其中一隻海膽質素麻麻，負責人就即刻開過第二隻，確保送到客人手上嘅都係高質海膽。

記者今次係第一次食即開海膽，拎上手以為會好拮手，但係原來又唔係喎，而且海膽拎到上手都仲識郁㗎！

即開海膽試食報告

$20一隻即開海膽，都算抵食！食海膽最怕就係臭，但係今次係每日新鮮送到，超級生猛，完全唔擔心唔新鮮變臭。

海膽食落好鮮甜，而且略帶海水味，質地方面就比較稔，都幾漿口。味道雖然無市面常見嘅馬糞海膽咁甜，但係新鮮已經加晒分，翻啅指數超高！

除咗一隻隻咁order，仲可以一盒盒咁買，一隻海膽大概4、5啖就食完，但係呢一盒海膽，可以食成4、50啖！雖然離咗殼令海水味無咁重，但係海膽一樣都係咁鮮甜，而且大啖大啖咁食，真係好有罪惡感！食完之後，過咗差唔多1個鐘，都仲係齒頰留香㗎！

提提大家，未經煮熟食品可能有衛生風險，請先自行評估。

西貢即開海膽

地址：西貢萬年街96號全記海鮮菜館 對開海面（顯示地圖）
營業時間：12pm-5pm（視乎每日情況而定，建議先致電查詢）
電話：93240788

想知更多香港好去處，留意Mandy facebook專頁：