5位數字起!海外直升機求婚指南 @ Travel佳

博客

近排喺網上鬧得熱哄哄嘅話題,一定唔可以唔提先喺冰島影pre-wedding,再豪擲40萬喺酒店用直升機求婚嘅嗰對情侶,Travel佳唔理佢係真廣告定真人騷,只係知道廣大收入5位數嘅上班一族,唔少人都渴望可以經歷如此夢幻求婚又想慳番啲錢做首期。縱橫咁多地方嘅我,點可以唔醒幾個平民版嘅直升機求婚指南俾大家呢?飛埋去第二個國家玩埋加求婚,計落都仲係5位數字內,係咪好心動先?

選擇一 新西蘭無人雪山頂

講到浪漫,Travel佳永遠無法忘記喺新西蘭Queenstown嘅一趟直升機之旅,當年Travel佳一支公參加電影《魔戒》拍攝森林場地嘅Milfound Sound觀景直升機之旅,2個小時嘅旅程,沿住大片無人嘅森林樹冠頂高速飛行,直到一座高山瀑布突然放慢速度,緩緩在瀑布旁上升,睇住瀑布變升冰湖再變成大片嘅冰川,最後直升機再降落喺2,000幾米高、無人踏足過嘅雪山頂上,實在畢生難望。雖則山頂寒風凜凜,啲粉雪有成米深,令人舉步為艱,但喺呢個你肯定唔會再嚟第二次嘅地方,喺唯一可以帶你嚟同帶你走嘅直升機師作證下求婚,相信都肯定葡萄死朋友同同事啦!最重要係,兩個人嘅直升機之旅,計落都唔駛10,000港紙,係咪好吸引先?

Glacier Southern Lakes Helicopters
收費:NZD810/HK$4,106
網址:https://www.glaciersouthernlakes.co.nz/scenic-flights/milford-flights/

選擇二 尼泊爾世界屋脊下

明嘅!Travel佳都知有啲朋友仔覺得飛去新西蘭條數和味咗啲,近近地其實尼泊爾一樣可以做到相同效果,仲可以體驗埋真實版嘅「高海拔之戀」添!喺該國首都加德滿都有唔少營辦商都有安排直飛5,500米珠峰大本營嘅直升機之旅,當中除咗可以近距離觀察森林、冰川同喜瑪拉雅山脈連串雪山,仲可以喺8,848米嘅珠峰下求婚。不過,唯一缺點就係現場空氣實在稀薄,就算幾興奮都唔好太hyper呀!

Helicopter Tour to Everest Base Camp
收費:US$3,850/HK$30,030
網址:http://www.ametreks.com/itinerary_detail/118/helicopter_tour_to_everest_base_camp

選擇三 婓濟降落無人小島

「好老套啫!」Travel佳明嘅!但喺珊瑚小島上砌上「Will you marry me?」並降落其中,又的確可以冧到唔少女士。想平平地,Travel佳就推介啱啱去完嘅南太平洋島國婓濟,貪直飛當地機票幾千蚊搞掂,而當地唔少直升機公司都有提供tailor-made嘅求婚套餐,價錢最平又4位數字起,喺ocean villa嘅resort入面突然一架直升機出現,載你同另一半出發去海中小島……拍戲般嘅情節,要做到一啲到唔難喎!

Heli-Tours Fiji
收費:FJD250/HK$904起(視乎旅程而定)
網址:http://www.helitoursfiji.com

選擇四 夜之東京鐵塔旁

唔少人始終對大城市有情意結,而東京就係唔少港人至愛,東京鐵塔好多人都去過,又有冇諗過夜幕低垂,當直升機飛過時向另一半表白呢?其實,要喺東京夜空中飛行,價錢一啲都唔貴,港紙千幾蚊就有交易,都不失為一個另類空中求婚嘅好選擇。

tokyo_city_japan_night_building_tower_hd-wallpaper-1482435

エクセル航空
收費:¥23,700/HK$1,541
網址:http://www.excel-air.com/english/cruising/tokyocourse.htm

最新吃喝玩樂資訊