鬼佬 Captain 派利是？多謝哂喎… @ Mr. Pilot
同其他大時大節一樣，航空公司在農曆新年期間一樣照常營業。為了減低同事們因為要在過年時番工所以黑面的可能性，大部分同事都會準備互相安慰的方法：未結婚的可能會派糖果朱古力，已經結婚了的就可能會派利是。
好似一般 office 一樣，雖然胡亂散播朱古力同糖就冇咩所謂，但利是就一定會根據輩份年資而派發，所以年資較淺的空姐空少們絕對唔會派利是給予職級較高的同事，除非大家一早係 fd 子！而根據飛機上的 chain of command，就算最初級的機師都高級過最高級的空姐空少，所以機師要派糖派利是就一定走唔甩㗎啦。
在香港，華人機師人數不多，所以其中一個好處就是較容易在農曆新年攞假。當聖誕新年復活甚至感恩節（Thanksgiving）都有一大班鬼佬爭崩頭想放假時，農曆新年相對少人 request，所以要攞假其實唔難。不過，本人曾經試過因為有 syllabus training 而不能 request day off，直接導致在農曆年期間要返工派糖。不過我們當然不會在公司內三唔識七見人就派，而只會派糖派利是俾認識嘅同事，以及一齊 operate 班機嗰 set crew。
成件事其實都有尷尬位：如果隊長冇嘢派而我哋做細嘅有，又有啲越權 feel 兼唔俾面隊長；但係如果早有準備又唔派，成件事就超級戇居！不過我很好彩，暫時都未遇過咁嘅情況，因為就算係鬼佬隊長，有好多都好識做。未結婚的多半會有金莎或者瑞士蓮，結了婚的就會跟隨中國傳統派利是，不過他們派出來的利是就可能會令你個心離一離！
你知唔知咩叫做「識少少扮代表」？我可以話你知，某些鬼佬機師就是這樣子！可能是成長過程時教育不同，可能是文化上的差異，但個人經驗發現這些鬼佬對某些事情只有六七成肯定時，就會說得實牙實齒，亦不會自發去找出餘下的三四成去充分了解一件事情（其實與一些「其他國家」的人民不相伯仲）。如果你對事情唔太清楚，你分分鐘俾佢 fake 咗，但係如果你對事情好很清楚，你就可能會被他的無知搞到你哭笑不可！為什麼無啦啦踩鬼佬？就是因為他們對「利是」的認知囉！
他們所派出來的利是大部份都是正常的，不過有些鬼佬就喜歡玩嘢，例如用同一設計的利是封裝著不同數量的金錢然後隨機派發，甚至使用顏色大小不同的利是封，要空姐空少們自己潛烏龜。收到這些利是最少都叫做有錢落袋，有些鬼佬就索性扮財神，放朱古力金幣在利是封內算數。最過分的就是那些知道中國新年要派利是，但並不清楚派利是的意義是甚麼的鬼佬機師。有人就試過收到鬼佬機師的利是後，發現利是入面乜 · 都 · 冇！啋啋啋啋啋！
唔怕一萬至怕萬一，正因為這原因，如果鬼佬 Captain 派利是，我就真係寧願唔收。倒不如食多幾粒朱古力，再用朱古力嘅苯乙胺（Phenethylamine，簡稱 PEA）去抗衡因為要初一啓市而帶來的沮喪感算數！
延伸閱讀：
