即係咁，Kenny豬俾外交部拋一拋即刻死狗改口風，同佔中運動劃清界線，(火農)咗就一定了，不過阿珍都唔否定，Kenny豬嘅音樂確實喺中國廣受歡迎呢點，特別係入住大陸的酒店時，由Lobby、Lift以至餐廳女廁個廁格，無時無刻都聽到大師的作品，有無治癒作用就唔知，但阿珍就已經熟到可以一邊屙一邊啍！
之後聽姊妹G講，原來呢類經常喺公眾地方播放的背景音樂有個統稱，叫做Elevator music：「總之聽落要好輕柔、好舒服，最重要係旋律好簡單，Loop到尾再接番上頭都無人覺。」不過，大陸都唔係間間酒店Hea住播，旅遊記者F話：「有年去上海和平飯店採訪，送咗張由酒店爵士樂隊錄製的大碟俾我哋，都聽得過嘅！」
另類經典
To be fair，阿珍十幾年前都因為睇完《壹號皇庭》，懶有品味咁學人買咗2隻Kenny G的專輯，當時又點會估到之後出入酒店廁所，都會重復咁Loop住聽……
七星級品味
杜拜的七星帆船酒店未必人人住得起，但原來酒店N年前開始已經同德國唱片公司合作推出自己的音樂專輯，合共有3張咁多，由迷紛到中國風乜都有齊，都叫有誠意，有興趣可上網搵搵。
應節哈囉喂
其實西洋鬼節已經等同嘉年華會，俾大家有藉口扮鬼扮馬，阿珍建議酒店可以用《Halloween》隻原聲大碟做期間限定的背景音樂，當堂勁好feel。
心水自選歌單
其實依家唔少酒店都可以俾住客自選房間背景音樂，但選擇始終有限，如果俾阿珍揀，近期首選一定係《布達佩斯大飯店》電影原聲碟，配樂結合咗捷克、匈牙利、波蘭等國家的音樂，夠晒旅遊感。
