愛文生．港我知@呢啲嘢啊

保留了傳統排檔的鐵皮木板攤與開放式廚房，亦進了大鋪，免得食客「蒙古王打仔」（大汗耷細汗），更光猛舒適。外頭鑊氣滿燈，火光紅紅，侍應快手搣單上菜；內裏涼涼地啤兩杯，欣賞著快來快往的侍菜模式，與朋友滔滔不絕，實是交杯起筷的理想場所。這晚友人替我慶生，待我幫菜式都起個吉利的名字吧！

橫財就手: 鐵板黑椒咸豬手

別以為排檔一定吃老菜，黑椒咸豬手吃得多，鐵板上還算第一次看到。見枱枱也叫一只，我們也來贈贈興。鐵板由侍應哥哥搬出嚟一路滋滋滋，一路飆哂煙，嗰吓已經好有架勢，令到在場食客也會紛紛抬頭張望。

黑椒洋蔥汁淋於飯中，咸咸哋嘅肉塊，令人扒多幾口。豬手炆得嫩，骨肉易分開，不吃力，不用侍應幫忙，自己動手更顯風味。加上有備用刀叉，影出來如西餐廳一樣，大排檔X鐵板餐，愛文生見！

金銀都有:金銀蛋莧菜
大排檔多數菜式具鑊氣兼夾熱氣，莧菜夠哂清而且咸皮蛋聚火，忍唔住飲多兩啖湯。份量亦夠哂足，最重要嘅蒜子夠哂，炸到香一香，又唔洗爭嚟夾。

歲接聖旨: 豉椒炒蟶子
嘩！邊有咁大隻咁抵食嘅蟶子㗎？貝殼類煮完會縮是常識吧，竟然都仲有咁大隻，抵食抵食。豉汁夠水準，豆豉香，不會厚粉搞到結遢遢；炒功一流，汁不只掛在表面，深入蟶子內裏。值得表揚是青椒與辣椒：坊間很多豉椒見豉不見椒，紅紅綠綠的椒在此味比例合適。有多啲料頭，令人吮都吮得開心。

金哈滿屋: 富貴黃金蝦
咸蛋味道入哂殼，只嫌蛋量少了些，沒令人過足咸蛋癮。蝦也小小一只的，炸得鬆但有少少過乾。但味道是一流的，只是不好運，沒分到更大隻更多蛋更大碟的。

大雞大利: 鹽水沙薑雞
是冰鮮雞，味道可以，但沒什麼特別的。肥是夠肥，沙薑也調得不錯，只是在愛文生叫雞好像浪費了一味菜的配額。

大智若漁: 漁香茄子煲
用瓦煲上菜，是真正的煲仔菜。由侍應掀蓋，見到煲內熱氣騰出，滾得卜卜作響。茄子沒煮得爛溶溶，具質感而一咬即開。鹹魚粒多到唔洗錢一樣，大大粒好惹味。茄子需吸收大量油份才煮得好，所以汁一定很油。

但無辦法，半軟狀茄子配肉碎鹹魚粒，叫多碗飯吧。矮仔吃矮瓜，正好形容我這個大好茄子之人，去到哪一見此道也耐不住。

牌子老，味道好；由排檔做到上鋪。大碟頭，興志高；啤多兩杯唔方燥。

大概港式老牌食店均有股傲氣：在等位時間看見一名不太禮貌的媽媽級客人明明比我們更早來到，啊姐卻在俾飛我們進內時，輕輕帶過—「佢咁燥，我係唔鍾意俾位佢，由佢等下囉！你地入先啦。（奸笑）」

是鬼馬？是有人情味？還是待客不周？分不清，實是港版「愛登士」家庭才真。

愛文生

深水埗荔枝角道215號 2393 9315