【夜媽媽又口痕】四款必試瑞典朱古力零食@為何斯德哥爾摩沒有譚仔三哥
▲KEX朱古力威化
咬落口感就似KIT KAT，不過味道都幾大分別。
D朱古力偏甜，而且唔知點解我形住佢有D煉奶味。
每次一食就食兩包先夠喉，呢個有機會真係要試呀！
▲CENTER拖肥軟心朱古力
聽個名叫Center都應該估到佢個涵有D竟轟。冇錯，佢入面有係有拖肥軟心架。
呢款係程仔最愛，味道偏甜。（又偏甜，其實瑞典人食野真係好Q甜。）
我個人就麻麻，因為我有蛀牙呀，一食就癡住曬好痛。
誠意推介比冇蛀牙嘅朋友。
▲Ländia朱古力波波
我諗呢個可以話係瑞典版嘅糯米磁。
外面癡滿曬椰絲，中層係朱古力皮，而個心係軟綿綿嘅綿花糖。（比綿花糖再軟D，其實唔知咩嚟。）
個人推薦放雪櫃雪凍少少先食，感覺反而冇咁膩。
呢款簡直係我至愛呀，而且個樣又靚，送禮一流！
不過如果買番香港最好hand carry，我試過將佢放落行李寄倉，番到香港成盒波撞到溶溶爛爛。
▲Daim焦糖朱古力
一個字：脆。
外層係薄薄嘅牛奶牛古力，內層係值十個脆嘅焦糖涵。
個朱古力皮其實真係好鬼死甜，不過好彩入面個焦糖涵少少苦苦地又balance到喎。
呢款誠意推介比冇耐性鐘意咬糖、朱古力嘅朋友。
其實瑞典嘅好味零食又點止呢幾款，有機會再同大家介紹多D。
不過我最掛住嘅都係樂天熊仔餅同家頓朱古力手指呀。
延伸閱讀：
