北韓解禁 伊波拉叫停非洲@杜遊珍

博客

廣告

早前金仔領導嘅北韓,為免大量來自非洲的長跑好手參加平壤馬拉松時把伊波拉病毒傳入朝鮮,竟宣佈禁止國外跑手參賽, 同時叫停所有北韓旅行團, 隔咗一排上星期終於解禁喇, 而且月內會復團,只係來自疫國的旅客要隔離檢疫。阿珍當然好恨去北韓踩場,不過令我嚮往更耐的非洲之行,舊年因為伊波拉改期,似乎更遙遙無期。

做開安排非洲Safari 行程的姊妹K說,自從伊爆發後,非洲團查詢直線下滑,即使係距離爆發疫症十萬九千里遠的南非和博茨瓦納(誇張咗,實數約五千公里吧!),幾乎沒有查詢,好多tour operator同酒店都嗌晒救命!雖然阿珍都唔敢去,但今年係咪「趁低吸納」睇動物的好時機?「咁又唔係噃,當地做Safari 嘅高檔酒店規模細, 房間雖然較遲先填滿,但房價一毫子都無平過!」另一邊廂,航空公司要為非洲非疫區國家重建信心,想搞fam 去睇下當地生活幾咁正常,點知又爆出一單電視台直播被洗劫新聞,「正常生活咪治安差囉!」口痕姊姊M笑曰。

翻查新聞,世衛公布命喪伊波拉的人數剛突破一萬,疫情蔓延情況雖獲得改善,但要在42天內沒有新增個案才算疫情結束,阿珍深信遲啲去都仲有動物睇嘅!