京阪
京阪

京阪 行(二) -費煞思糧@呢啲嘢啊

博客

廣告

京阪 行第二日一早起身,因為9h要人好早check out,沖個靚涼執好行李就拖嘢搵第二三晚住嘅酒店,非常期待,因為係過百年的日式和屋翻新後的民宿。早一晚經電郵聯絡屋主,但其實好怕,似係會搵極都搵唔到。點知,已經唔夠衫嫁啦,真係拎住行李傻仔咁係一條街由街頭行到街尾再行去對面街咁搵,好彩屋主Toru勁好咁係街上跑嚟捉我入屋。凍到傻嘅我都唔係幾聽到佢介紹咩,但Toru的英文算係一級棒,暖番身就同佢吹咗陣水再參觀埋間百年老屋先走人。佢仲將個好難睇得明嘅巴士路線圖簡單講解咗我聽,勁窩心!

早早搭得京都巴士,梗係買一日乘車劵,500円之嘛,一日搭三次(一程本身250円)已經抵哂,遊客實鍾意。

三嵨亭 – 壽喜燒午市套餐(Sukiyaki)

去番近9h個邊的有蓋商店街,旅行喎,作為鍾意食嘢嘅人斷不能縮食,今日午餐決定係食豪啲啲。 一早做定功課,三嵨亭乃百年老店,創於1873年,已經傳至第5代,專營壽喜燒,又稱鋤燒,因典故出於鋤頭上烤肉而命名。壽喜燒多於大時大節先食,亦分關東西風,關東風有不飲湯的火鍋之稱,因食物伴以湯汁煮成,事由關東大地震由關西傳入;是次吃的,在關西京都,當然是本物原型。

三嵨亭京寺町三條本店鋪位很大,地賣原材牛肉,樓上則為食店。店門掛著午餐set的價錢,5,940円,午餐嚟講算豪嫁啦,但相對晚上過萬円的套餐,能一試老店壽喜燒,真係抵食。入店脫鞋,侍者細心而有耐性,好彩我早一點來,因我剛在準備入店,身後已有數餘食客訪至。

未寫嘢食前,同我啱啱番到香港掛係唇邊個句一樣,一定要食,一定要試,真係好好好味!

我應該是當日全店首位顧客,被女將領到大廳中最入而中央位置,古色古香的設計醉人。每個位置間也有間簾遮住少少保私隱。每位客人均會有一位女將全程跟實,執頭執尾,好好笑容,仲拎埋英文餐牌,簡單英語講解每種食材。

一起身的我就點咗烏龍茶 配一配呢個heavy的午餐。六角形嘅枱,配上六角形嘅爐,仲有六角形的鍋,唯三嵨亭獨有,對筷子前後皆尖,亦有多少配合;筷子架也用上燈亭之設計。上菜時,順手打了個好黃而一睇就知正嘅生蛋俾你沾肉食。

雪花肥牛,吖,唔係,係霜降黑毛和牛,一個餐只有6塊,好矜貴。煮時女將會倒些許白糖於鍋中,再放肉片於上煎煮,到一定程度再倒下醬汁,轉眼就食得。由倒糖到煮得肉被滾起蒸發的醬汁氣泡彈得起起伏伏時,視覺嗅覺已經有一定享受,雖煮得快,卻令你心狂叫:快啲快啲!

煮好再夾進蛋漿,日本蛋就是蛋味濃而黏身,配上煮得咸甜的牛肉,肉入口有融開的感覺。縱已有蛋與醬,但咬落仲係勁多肉汁,而你係好易分辨到幾種味道,佢地又好夾咁存在一起。那一刻,你已得到嗜牛慾望的解放 。每一位讀者,尤其稱自己為牛魔王的,真係要慎重考慮,一試你番唔到轉頭,世上無咩邊幾隻牛再可以好似咁,滿足到你。

整個餐安排得好好,食完三片正嘢,就煮大蔥,洋蔥,豆腐,安平麩(一種山口縣的特產,加工食品,女將對它照顧有加,因為是工匠的精品吧,出於日本對工藝的尊敬(好似係),想知係咩可以睇呢度)。食材相對淡味而簡單,清清口,也突顯牛肉的可貴,牡丹也需綠葉扶持。btw,其實佢隻醬加糖,撈咩煮咩都好好食…好屈。

煮到咁上下,女將侍上白飯與漬物,仲有一碗仔啡粒粒。正當迷緊係咩嘅時候,他就說這是拌飯吃的。半信半疑下聞咗聞就知係好嘢,係勁香嘅牛肉乾味。撈飯嘅時候,簡直牛上加牛,一口牛味,微甜的牛肉帶啲濕潤,轉個頭就無咗半碗,直至仲記得有3塊未燒嘅牛先停咗。

說時遲那時快,當我清到個鍋咁上下嘅時候,女將又出動煎埋個3塊。看落同頭3塊係差少少,雪花分佈無咁平均,但依舊好味,肉味香濃。最後先搞掂埋個麩同煎得淋透白的洋蔥伴肉,好完滿。

飲飽食醉之後,會附上一杯抹茶予你清口減膩。仲有時令生果,今次有甜到漏嘅蜜瓜,勁多汁。非常完美,女將仲勁好笑容咁多謝你,一路行出去,一路夾道謝過你幫襯。

睇到呢度,下次你去京都,唔係唔試下嘛?記住午餐堅抵食。

錦市場

食完飯,就去咗就近嘅錦市場體驗下食材商店街的風味。兩旁一堆和式食品批發零售,新奇而且熱鬧,但係香港人都好多下,勁多廣東話飛嚟飛去。留係腦中最深印象,係漬物類別多到出奇,睇相就知一二。

八坂神社

為日本神道教素盞嗚尊及牛神的總本社,素盞嗚尊為須佐之男,著名殺過八岐大蛇,有睇火影忍者就知咩事。而內裏有好多不同嘅小神社,你話逐個合什拍拍許願,都有排玩。

円山公園 – 衹園枝垂櫻

行入啲就到公園,咁啱遇著花燈節,有學生花燈作品展出。公園景色好靚,有山有水有草有樹有花有橋有鳥,仲有出哂名嘅衹園枝垂櫻,可惜未開花。

高台寺

另要俾錢入嘅高台寺,景都靚,仲有日本婆婆作聲音導航,但唔識日文,有點浪費了。

八坂庚申堂(金剛寺) – 彩色身代猿

位列日本三大庚申堂之一,供奉青面金剛。信奉「三尸說」,古傳人內有三蟲會在庚申天干地支之日去天帝前告狀,故要不眠守日。申字日文讀音如猿,故用猿意指金剛之象,現多用身代猿(一個個彩色包包),意作猿會吃掉蟲的意思。

寺內猿均三隻三隻咁出現,多作「非視,非言,非聽」之狀。

八坂の塔

供奉藥師如來及眾神,為日本最初之寶塔。出哂名嘅影相位。

二年坂 – 招財貓與葫蘆店、綠茶雪糕甜筒

二年坂有好多商店,專營手信,而最特別係有呢間賣招財貓同不同葫蘆都有嘅店。我亦都係呢度食咗個無敵抹茶雪糕,凍但係唔食唔得,求其係日本搵檔食,都仲正過係香港食。茶味濃而滑,威化仲香脆。寒天飲冰水,別有番風味。

清水寺

一寺內只有一佛宗「唯識宗」,於日本少之又少,又係世遺,供奉千手觀音。日本入榫技工藝的舞台造設計,唯清水寺獨有咁大。寺旁有一人人都舉下的弁慶杖,但實不為弁慶所用。

地主神社(戀愛神社)

供奉大國主命,為京都最古月老,曾於神話救白兔,故白兔亦為姻緣神獸。戀愛占卜石我就無玩,但見唔少後生男女都有玩,我就求下算啦。

音羽の滝

經音羽山流出,來自地下1000m地下斷層,三行水分別作祈不同願望之用,左學問,中戀愛,右長壽。傳只可選一款,否則中願機會攤分。

七味家本店 – 七味粉發源地

食唔少,梗係朝聖兼買支番屋企。

一澤帆布

行完哂祇園寺廟區,就到咗本旅程其中一個重點,就係去一澤帆布度買袋。三兄弟嘅爭牌子擁有權嘅事件已經可以拍一套電影,結果形成信三郎、一澤、。我一嘢就買咗兩個,貪佢襟睇同耐用。

壹錢洋食 – お古乃美焼

當行完景點又shop完ping,最好梗係搵個地方醫肚啦。搵嚟祇園名物,壹錢洋食,專營獨沽一味,與店同名之食品,因開創時只賣壹錢,本身又不似日本食品,故叫洋食而命名。名字巧,但實物是お古乃美焼,為戰時物資短缺集百家之大成的食品。食品於昭和時期發明,因而店內有著昭和時期古風。

店內出名嘅不只源於食物,仲有著咗浴衣的「姐姐」陪坐陪吃,令不坐足人的店鋪,添上幾分熱鬧,亦成為我一人之旅免於晚晚自己食,哈哈。

又凍又落雨,叫杯燒酎暖下身,透明冷得露珠滿杯身的酒,反而令我暖番唔少。

お古乃美焼,有蒟蒻、天婦羅粒、牛肉碎、紅薑絲、竹輪、蝦米、蔥花、仲有最緊要嘅蛋,撈埋麵粉煎,上面再加紫菜絲。個種多重口感第樣嘢搵唔到,配埋醬汁,有咸酸汁同辣醬汁供客人再添,本身上菜已經有汁,但我都係貪吃想試多點味道,本身味道已經夠濃。咁多種材料同濃汁,配本身無咩味嘅蒟蒻,口感複雜而味搶。

牆上掛住好多繪馬,但都係畫咗好多三級或以上的性關聯圖畫,意淫非常,亦係呢間鋪嘅另一出名之處。同食物一樣咁重口味。

另外店中有一個店的縮小模型,好鬼像真。另外門口有小白想搶食而咬甩褲的出名情景,眼離少少有壹錢大明神,拜嘅係道祖神,屬淫祠,性崇拜的一種。

食完仲行咗轉花見小路,原行程係想撞下,睇下好唔好運見到藝妓,可惜了。但好彩嘅係,呢幾日係清水寺夜間觀拜開放,仲撞正埋花燈會,令今朝睇過哂嘅景可以一次過睇埋夜晚正景。呢番雨中花燈夜遊清水之感,唔係咁易體會到。好累,亦令我部相機浸咗水咁款。

那天,那夜,那刻,雨特別大。而天下個不停的雨點,像一幅幅被打碎的透明了卻渾濁的回憶畫面,下不停,是粉碎了才落下,還是觸動才令它們破碎?它們正凋零,緩緩的在心中飄落,急重地落在地上。

三嵨亭
中京区寺町通三条下ル桜之町405 075-221-0003
www.mishima-tei.co.jp

壹錢洋食
東山区祇園町北側238番地 075-533-0001
www.issen-yosyoku.co.jp

延伸閱讀:

京阪行(一) - 浪客吃心@呢啲嘢啊

宇治抹茶 最地道的京都味道