志村商店
志村商店

日本超抵買零食福袋! 1000日圓志村商店@五月玲子。日本工作假期

博客

上野的阿美橫丁係旅客掃買手信同埋零食嘅好地方,每本旅遊書都一定會介紹呢間賣零食福袋的志村商店。去旅行時除咗不停發掘新景點之外,都可以去重溫一下老店架。

志村商店出名賣的係 1,000 日圓的零食福袋,而當中最吸引嘅係叫賣的氣氛。當你同店員講要一個福袋時,店員就會當面拎起一盒盒不同零食俾你睇,之後會好豪爽咁「丟」入膠袋入面,配合叫喊聲和節奏,呢種叫賣方式真係幾有趣架,而且會有種令人覺得「我真係買咗滿滿一袋好多野」的感覺。

我當初先問店員可不可以拍片同影相,佢哋問我來自邊度,我答香港之後佢哋好標準咁講咗句「多謝!」哈哈!之後就越來越多人圍觀啦。我買完之後有個日本姨姨來買福袋,佢配合住店員喊聲不停叫「もう ちょい~もう ちょい」,結果店員真係俾多咗2盒零食佢,早知我都叫下啦(笑)各位都要學定呢句日文「もう ちょい~もう ちょい」(意思即係“再多少少”)

以前志村商店上哂電視同埋雜誌真係好熱鬧,而且印象中記得呢個袋是免費送的(希望我無記錯)而家就要加100円先有個袋,今次我就手痕買咗返來。

本身志村商店係零食批發商,價錢已經比較便宜。而呢種超特價促銷的食品都預左可能有2種情況:一種係唔好食變倉底貨唯有促銷,另一種就係就快過期要盡快賣出去。咁其實到底志村商店其實抵唔抵?為著呢次買的零食做左個列表,包括數量,價錢和「賞味期限」(最佳食用日期)俾大家參考下。

一袋入面總共有7款共14件零食,總值2,607円,慳左1,600円左右,價錢來看絕對是超值。不過你會發現零食選擇都限於森永和KANRO這2個品牌(還有一個海外牌子),在另外一些網站有看到全都只是森永的零食,也有些裡面有4﹣5款不同品牌,簡單來說真的是隨機賣的。如果你本身是個零食愛好者,去旅行初期買一袋,可能未離開東京就已經不知不覺食哂了(笑)

如果是用來買手信,就要注意「賞味期限」這一點。現在是2月而期限都是在3月/4月份,即係得返1﹣2個月左右。最好係買回去後盡快派哂俾公司同事或者屋企人,不太常見的朋友就留唔到俾佢哋嘅了。

講完「快過期要盡快賣出去」呢個情況,就講下「唔好食變倉底貨唯有促銷」呢個可能性,即係有幾伏(笑)逐款都講下。

首先係森永的朱古力波:(左)花生朱古力波:花生好香脆、好快食哂成盒(右)熱情果味:我個人覺得係個伏、果陣味好怪、食左幾粒就唔想食、但我同事反而話好鍾意食、所以我送咗俾佢食(笑)

(右)KANRO TRAIL 能量Bar: 平時有時工作太忙我都會食下能量Bar頂肚、不過呢款真係唔好食…(呆咗…) (左)朱古力食物纖維:之前我都有食過,士多啤梨味道甜甜地、加上有大麥小麥食物纖維都算係幾健康。我同事超級鍾意食、試過專登喺網上成箱買返來慢慢食,所以我送咗俾我同事食(笑)

(右):對於香港朋友一定唔陌生,由網球手舒拉寶娃創立的糖果品牌Sugarpova,呢款係由西班牙入口的網球形香口膠,外表真係好似網球,但就外表好硬,味道係檸檬青檸,完全無諗過會出現係個日本福袋到…(笑) (左): 甘樂KANRO熊仔軟糖,有3種味道包括檸檬味、士多啤梨味、青提子味,口感係軟綿綿又有彈性,但味道一般。

森永MaSH BON綠茶綿花糖朱古力:裡面軟綿綿既綠茶綿花糖加上朱古力,好好味呀。

總結一下收穫其實整個福袋不算太伏,整體係睇得開心,買得開心同埋食得開心既!仲未去過的朋友要去試下啦!

アメ横 志村商店
地址:日本〒110-0005 東京都台東区上野6-11-3(顯示地圖)

 

延伸閱讀:

日本強發明! 隨時食得的暖包?!@五月玲子。日本工作假期

日本便利店超大熱蜆湯!6大好味湯品|掃食JP便利店|@五月玲子。日本工作假期

最新吃喝玩樂資訊