去抹茶館食韓國嘢@阿CHEAP

博客

廣告

有日同朋友去睇《飛鳥俠》,因為未夠鐘開場所以去食個晚餐先

冬天嚟講呢一日都算係熱,所以就去咗抹茶館諗住食個飯再叫個雪糕

個人嚟講都幾鍾意泡菜味,平時食韓國紫菜亦首選泡菜味
所以就叫咗呢款唔太Sure係韓式定日式(定日式韓食)嘅丼

個飯望落都同Menu張圖幾似嘅,過到商品說明條例啦
不過食落真係冇乜泡菜,而且唔辣,同我嘅想像有啲落差

另外鄙人見識少,有冇人知道紅色一條條好似蝦鬚咁嗰啲係咩嚟?

順便講下一啲以前嚟抹茶館食過嘅嘢(其實我都幾常食抹茶館)
佢哋嘅刺身飯有啲會加埋Wasabi同薑落去,如果唔鍾意嘅話落單時就要講定喇(貼心提示)
三文魚都切得幾薄,不過都係喺合理範圍內嘅

我諗去抹茶館嘅人都係食甜品多,對呢兩款應該唔陌生
因為我唔係幾鍾意食Cream,所以食過一次個Tiramisu就怕怕
個抹茶Mousse我覺得比較啱我胃口(雖然面頭都有Cream),佢裡面係啲綠色Mousse,幾重芝士味,食到尾忍唔住係咁用隻匙羹刮張紙殘餘嘅Mousse嚟食

佢哋嘅抹茶軟雪糕溶得超級快,抹茶軟雪糕加一後其實同CitySuper嗰啲抹茶軟雪糕差唔多價錢
CitySuper嗰啲結實、襟食好多,不過抹茶館話晒叫做有得坐,所以好難就咁比較個價錢嘅
講起抹茶館嘅芭菲,好耐之前有次叫咗個抹茶豆乳布甸芭菲,但食嚟食去都唔見有布甸
原本以為係布甸嘅白色部份其實都係Cream嚟,所以問侍應點解冇布甸,係唔係上錯咗嘢食
點知侍應話:「布甸喺入面㗎喇,可能溶咗」
天呀!!!你講真定係敷衍我,布甸會咁溶法嘅咩?咪玩啦!
事後我上網Google有冇人食抹茶豆乳布甸芭菲時搵唔到布甸喺邊,居然係有!

所以布甸到底去咗邊呀!啊!!!啊啊啊啊啊啊啊啊!!!!(剛聽完李逸朗版《傻女》)

PS 話說食完個泡菜丼後都有啲飽,電影又差唔多開場,所以今次冇食雪糕
PS2 我睇唔明《飛鳥俠》想講咩… 有人可以指點下我嗎?
PS3 唔肯定而家Menu仲有冇「抹茶豆乳布甸芭菲」,有人食過嗎?搵唔搵到布甸?
PS4 我覺得抹茶館嘅拉麵香係好香,但食落好普通(以佢嘅價錢嚟講),未食過嘅可以唔使試

 

延伸閱讀:
香港迪士尼遊記@阿CHEAP
人生交叉點@阿CHEAP

最新吃喝玩樂資訊