盜墓者羅拉
盜墓者羅拉

《盜墓者羅拉》拍給女性觀眾看的電動遊戲電影@方俊傑

博客

廣告

我信因果。若果沒有2012年的《飢餓遊戲》(The Hunger Games),全球票房接近七億美金,《星球大戰》(Star Wars)的正傳和外傳不會不約而同找女角主導,神奇女俠不會在《蝙蝠俠對超人:正義曙光》(Batman v Superman:Dawn of Justice)搶先登陸,《美女與野獸》(Beauty and the Beast)真人版不會把視點完全放在美女身上。接受現實吧,女性比男性更具叫座力,才會出現新一代《盜墓者羅拉》(Tomb Raider)。

有甚麼比改編《盜墓者羅拉》更方便?一個又靚女又好身材又好打又有錢接近完美的女神,將男性壞蛋打到落花流水,完全符合現今的社會潮流及市場喜好。可惜,《盜墓者羅拉》似乎是另一齣《神奇4俠》(Fantastic Four),中了魔咒,點改都爛。2001年的版本,大家很喜歡Angelina Jolie的性感造型,但其實前後兩集都爛極,票房也不算特別出色。來到2018年,女權提高了,估計票房會得到改善,但劇本沒有。講富家女在執拾父親遺物時,發現神秘筆記,於是出發去荒蕪小島,千辛萬苦到達,有個神秘組織正在找尋傳說中的魔女屍體,富家女運用驚人的智慧和戰鬥力,將成村白種男性軍人消除,讓足以消滅地球的女屍留於原地。

劇情的犯駁之處,簡直可以用隨手可拾來形容。隨便說一個:講到羅拉去香港仔找到吳彥祖船長揸隻船仔去非常高風險的小島搵失蹤的父親,搞到幾乎無命先到埗,點知,結局,原來求其是但便有架飛機安全降落,咁點解羅拉要冒咁大風險?你可能會話,人人咁有錢買到私人飛機咩?羅拉簽個名就富可敵國乜都做到喎,惟有解釋佢真係接受唔到阿爸死亡的事實,死不肯接管家產,情願送死,也不肯。情操真偉大。不過,怎解釋滯留在荒島七年找尋寶藏的員工,日日呻想返屋企見家人,偏偏唔跟運送物資的飛機返回老家食個飯呢?打份工啫,點都有假放啩?一句講完,架飛機大模大樣地出現之際,你會立即覺得之前的打生打死相當無謂。跟段父女情的鋪排一樣脆弱。

然後,你可以立即反擊一句:「有冇搞錯呀,睇《盜墓者羅拉》,仲睇故事?梗係睇女啦!」從電影公司宣布由Alicia Vikander接手,我已經知道世界變了,這是齣拍給女性觀眾看的電動遊戲電影。Alicia Vikander相當漂亮,但身材不屬於爆炸性,完全違背本設計來吸引男性玩家的原著,反而選擇一個女性最容易接受的類型。電影一開場,故意描述羅拉打拳不敵一個中性打扮的女子,將主角弱化其實是人性化,也屬於同一㮔功能。Angelina Jolie是由男性品味塑造的羅拉,Alicia Vikander是有心討好妹妹團的羅拉,事隔十七年,轉了一個身。上一次,滿足男人,劇本不濟,票房便被影響;今次,滿足女人,劇本不濟,但隨時可以靠政治正確補救有餘。就係咁簡單。

《盜墓者羅拉》
導演|諾華烏泰格
演員|艾莉西亞菲瑾德、吳彥祖、多明尼維斯、禾頓葛金斯
片長|118分鐘
上映日期|3月8日