圍威喂,老嘮爐@呢啲嘢啊

博客

廣告

好冷的天氣,除了攬身旁伴侶的車呔,請佢食嘅凍柑,寒冰腿取暖外,還剩下的唯靠橕個夠讓自己充斥一下飽暖感,要不然怎渡過漫漫長冬?搵埋三五兄弟去邊一邊,就係渡過最冷一天的最好辦法。香港人一連四季都鍾意打邊爐,我都唔例外,呢家寫嘅都係夏天時去的,各位螢光幕前的讀者千祈唔好學,好燥熱架。呢家睇番啲相都會份外溫暖,放假天有三個兄弟出黎啤一啤,夫復何求?

雖然招牌大大隻字寫住豬骨煲,但令我想拎筆寫評的卻不四腳踏地,只背朝天。多得老死介紹,方能覓此味特別非常的火鍋,你心諗,打邊爐有幾搞野?咁你就唔好走寶啦。店鋪四四正正,唯有一個頂(音:頂頭鎚)頂(音:山頂)位,白皚皚如舊色辦館,但簡單裝修更覺自在,佬味十足。請原諒今次相片多於字,因火鍋就是料多。

調味架在火鍋店已不陌生,只會在任食才著重種種增味劑,真正靚料靚湯底不用雕花的陪襯。前題是最基本的醬油要好,能帶出味道而不過咸。九宮格,款夠就掂啦。

揭曉吧!是鮮魚鍋底,但還沒完的。

星斑仔鍋底
一放煲上黎已大陣象,又碟又蔥又壺,友人說這是好戲後頭的準備,先賣個關子。平常的湯底通常很快就上桌,尤其任食個款,唔是要酒家再即整即有啊嘛,唔是倒俾你仲要高質嘛。另端上的鍋起碼用上十分鐘左右才到,內裹有奶白色的湯浸著煎好的魚身,綠莞襯白,再加魚潛,挺美的(是魚反肚吧),整叫整劏整煎整煲湯,識食嘅一睇就知呢個湯正。

奶白色魚湯源自煲出魚肉內的蛋白質再乳化而成,除味道鮮甜外,還美顏的說。

是次考耐性的用餐,上菜用幾個字,到了又要讓魚浸透奶白溫泉,再把美人魚起出。你看,煮開的湯幾引死人,有層薄薄的油脂,有種保溫的感覺,湯易滾起,就會快啲有得食(好似係)。

之前備好的壺與蔥,在起好的魚放在碟上也未知所以,至伙計把蔥放好在魚身,拿起壺說句:「小心彈油!」,方知這壺是高壓油壺。一切謎底已經解開啦,原來魚弄湯後唔係放湯或撈起就食,上碟再加蔥放滾油,如同蒸煮。我最鍾意食蒸魚嫁啦,用湯煲起的煎魚,好像浸熟般嫩滑,幾可亂真。斑身沒有因為湯煮而散開,反因新鮮而實肉,用筷子可以一抽抽肉夾起。一魚兩用,盡食其味,也算食得招積。

墨魚膠、手切肥牛、餐肉
首先送上打邊爐必備的三兄弟。

墨魚膠(或其他手打的膠),比起手擠的丸類更具娛樂性,既考功夫又可以自己落手落腳咁整;膠身多半整到凹凸不平,沾醬汁更易上更爽皮;墨魚膠配上蟹子,咬口多重又香啲。

手切肥牛,唔洗多講,係用嚟試間邊爐店有幾專門。見呢度有切雙飛,已經唔錯,好處是肉更厚身,不易過老又可以俾更多肉汁留於肉片。肥唔算太夠肥,但勝在肉味重,牛香夠。

午餐肉,識食嘅梗係揀梅林牌。打邊佬食午餐肉有度好,就係可以當同啲湯加番味,又令本身太咸嘅餐肉沖沖身,又浸到軟淋淋。

象拔蚌
難得見兄弟,除咗啤啤佢,就梗係要豪少少。叫隻蚌食吓,爽到不得之了,鮮味加上切得剛好,厚薄度夠令滋味倍增。蚌肝甘香,四條友爭住食哂成盤。完全唔係幾洗點豉油,一兩滴吊味已經好好味。

雞脾菇、皇帝菜、竹笙、餃、蝦膠、田雞
菇菇係我雙臂楊過打邊爐的必選物,同菜一樣,有吸盡湯的多餘油份之用。皇帝菜,對於我來說有如加強版茼蒿菜,有著清香,也有人介定之為草味,一係如我極好之,一係勁憎食,唔講唔知,佢係菊類植物,會生出春菊。

竹笙則是湯中沒太多油,用來盡吸湯之精華的湯怪另類飲湯方法。餃是不能缺吧,包得飽滿,料也鮮。蝦膠如墨魚膠,但沒墨魚膠討我歡心。田雞則是友人打邊爐常點之物,我會照食但都幾怕有蟲……同埋香港田雞得個肥同多肉,無咩味。

香港人那麼喜歡打邊爐,多半是因為朋友的聚頭局吧。大班人可以邊等邊拾邊講邊笑,一路更新大家工作讀書戀愛家庭健康寵物,傾吓天文地理星座球賽衣著飲食圖書電影音樂咩都有。煮熟了,你夾我一舊,我淥多咗又俾番你,親到口水都唔怕食埋一份(你見相片不乏雲吞,兄弟鼻敏感,怕咩)。如果任食的話,仲會猜輸食埋佢。

開心時食起會更好味些,傷心時會吃得仔細些。四條友難得一聚,不開心嗎?唯欠一人,等你啊兄弟,幾時再「五彷永」再聚頭。好味卻差了一雙筷,笑著食又慢下來咀嚼。人生,得意卻欠什麼,痛著是痛了得著。樂活在當下,寒冬當盛夏。

正斗豬骨煲
太子花園街239號地下 2142 3886

延伸閱讀:漢堡神偷@呢啲嘢啊