白花油100周年期間限定店 聯乘三大Gen-Z潮牌 Y2K周邊/街頭服飾/減壓小物
廣告
陪伴無數香港人成長嘅經典老字號「和興白花油」，今年踏入一百周年啦！平時講起白花油，大家可能淨係諗起陣陣熟悉嘅藥油味，今次白花油大玩跨世代回憶同本地創意，仲破格聯乘三個本地Gen-Z潮牌，將百年經典搖身一變成為潮流單品，開設全港首間為期半年嘅Pop-up店。
復古綠白霓虹打卡位 必入全新滾珠裝及Y2K限量精品
店面以品牌標誌性嘅墨綠配白色作為復古配色，結合埋霓虹燈元素，營造出既經典又新潮嘅打卡氛圍。產品方面都有驚喜，除咗大家熟悉嘅經典小瓶，仲傳承多年專業配方推出咗全新和興白花油Roll-on滾珠裝同GoodDay精油滾珠棒，打破傳統框架，日常帶出街用就更方便。店內仲會首次公開發售多款自家限量精品，例如Y2K手機掛繩、和興白花膏鑰匙圈手機掛繩、織布袋、造型公仔鎖匙扣、一百周年金裝紀念版咖啡杯、紀念版手錶系列同埋抱枕等，將品牌元素完美融入潮流生活好物。
潮人必備：和興白花油 x GROCERY 限定服飾
想唔到白花油都可以著上身？今次品牌特別夥拍本地潮流服飾品牌GROCERY，以經典元素為靈感，推出一百周年限定服飾系列。整個系列將大家熟悉嘅白花油符號重新演繹，化成極具街頭風格嘅單品。款式選擇非常豐富，包括多款印花Tee、印花短版衛衣、印花衛衣、牛仔外套，甚至連帽款同手巾都有，絕對係今季必入嘅潮流單品，著出街保證回頭率極高。
實用生活好物 x DIY 減壓小物工作坊
除咗服飾，Pop-up店仲為大家準備咗一系列充滿香港特色嘅生活好物。今次品牌同香港原創設計品牌TEAM GREEN合作，推出一百周年限定小夜燈、磁石貼、匙扣同埋小擺設，將本土特色化作適合收藏同送禮嘅實用設計。如果你鍾意手作，就一定唔好錯過現場同香港文創品牌Pretty Useless Club合作設立嘅DIY Zone。只要喺店內購買任何產品，就可以親手拼配同製作專屬嘅Fidget減壓匙扣，有得買又有得玩，俾你嘅創意成為百周年紀念品嘅一部分。
關鍵詞
香港好去處
圖片來源：官方圖片
