死有對証｜61歲王綺琴演技大爆發！怒插韋家雄一句KO 網民激讚有霸氣

警署外爆發！王綺琴怒插韋家雄「你冇資格」

劇中王綺琴與韋家雄因女兒管教理念大不同而離婚，前者是操控慾極強的「怪獸家長」，甚至在女兒手機裝GPS追蹤。其中一場戲講述女兒被扣留，韋家雄在警署外勞氣質問：「咁即係點呀？依家懷疑雪蕾殺人呀？你好似唔緊張個女嘅？」王綺琴隨即「戲」勢逼人地反擊：「你呢？你做咗啲咩？你淨係識做自己嘅嘢，佢搵你嗰陣有冇睬過佢呀」、「我唔緊張？你冇資格同我講呢句說話呀！」罕有被窒到冇聲出的韋家雄只能拋下一句「費事同你講呀」便嬲爆轉身走人。

王綺琴為女再爆Seed「佢得十七歲咋」

另一場戲，王綺琴與馬貫東約韋家雄食飯，企圖打聽驗屍報告，但韋家雄以保密條例堅拒透露。護女心切的王綺琴即時「爆Seed」大鬧：「我梗係知（保密）啦，我同啲夥計都係咁講，但雪蕾係我個女呀，我唔可以咩都唔做㗎！」當韋家雄反駁因牽涉女兒才不能插手時，王綺琴又嬲又傷心地說：「個女仲畀人扣留緊呀，佢得十七歲咋，我哋唔理佢邊個理佢呀？」她將擔心、焦急、傷心及憤怒等複雜情緒一次過爆發，演繹得淋漓盡致。

61歲王綺琴86年選美冠軍出身 回歸拍劇演活惡媽

現年61歲的王綺琴，是1986年《電視小姐選舉》的冠軍，曾拍攝《大運河》、《奇門鬼谷》、《今生無悔》等經典劇集，近年則憑處境劇《愛．回家之開心速遞》的「蔥頭阿媽」一角深入民心。今次在《死有對証》的演出再次技驚四座，連對手韋家雄接受訪問時也透露，兩人會私下琢磨對白，希望呈現更好效果：「調整啲場口，令到觀眾聽落冇咁悶，睇得舒服啲」。

網民洗版式激讚：完全做到Madam氣場

王綺琴與韋家雄連場鬥嘴戲，為劇集產生強烈化學作用，不少網民都湧入討論區洗版式留言激讚，認為她氣場強大，完全不輸好戲之人韋家雄。「他們眼睛都在做戲」、「佢同韋家雄完全融入角色」、「做 Madam 好有霸氣，眼前一亮」、「做得超級好！勁似阿媽嗰種又嬲又肉緊」、「完全做到 Madam 氣場和母親的心態」。