利東街中秋800盞打卡宮燈 18米LED幻彩火龍回歸 百年恆香期間限定店
廣告
中秋佳節就到喇！如果你都想趁住週末同屋企人放鬆一下，感受濃厚嘅節日氣氛，灣仔利東街絕對係首選。今年利東街以傳統典故同地道節慶為主題，呈獻「彩燈·迎月」中秋慶典。由即日起至10月19日，200米長嘅林蔭大道掛滿超過800盞中式燈籠，食買玩都一應俱全。咁到底有啲咩玩？即刻睇行程！
800盞璀璨燈籠 剪紙宮燈訴說中秋傳說
一去到利東街，最吸睛一定係掛滿半空嘅大紅喜慶燈籠同五彩宮燈，數量超過800盞！燈海以黃、橙、紫、粉紅同綠色等溫暖色調交織而成，打卡真係勁靚。今年宮燈設計仲好有心思，首度融入中國傳統剪紙藝術風格，刻劃出后羿射日、嫦娥奔月、玉兔搗藥同吳剛伐桂等經典神話。除咗古老傳說，燈籠上仲有手作兔子花燈、一家人整月餅同食團年飯嘅溫馨現代場景，行街賞燈之餘，仲可以細味中華文化嘅深厚底蘊。
18米LED幻彩火龍震撼回歸
中秋正日（9月25日）當晚仲有壓軸重頭戲，闊別一年嘅18米長LED幻彩夜光火龍將會震撼回歸！火龍會喺晚上8時30分由中庭出發，巡遊至皇后大道東同莊士敦道入口，全程大約45分鐘。呢條火龍用璀璨嘅LED燈光取代傳統煙火，配合噴煙效果，仲會同LED醒獅及鼓隊精彩互動，俾你近距離感受香港非物質文化遺產嘅澎湃活力。
豐富節日體驗 週末市集與音樂會
除咗睇火龍同打卡，利東街仲準備咗一連串豐富活動。只要即日電子消費滿港幣300元並追蹤社交平台，就可以換領迷你宮燈DIY套裝，親手整專屬中秋彩燈。而中秋翌日（9月26日）下午2時至6時，仲有《秋月樂韻》音樂會，蜚‧聲學院、香港培道中學弦樂小組等多個音樂團隊輪流獻藝，陪大家聽住好歌過節。
百年老字號恆香進駐 期間限定店一站式體驗
賞完燈想買應節食品，可以去埋首度進駐利東街嘅百年老字號恆香老餅家。今次嘅恆香中秋慶典月餅期間限定店去到9月25日，店內有還原經典餅模花紋嘅巨型黃金月餅賞月座同埋恆香未來郵箱，買嘢仲有限定明信片送。值得一提嘅係，今年仲有由張智霖參與設計嘅心形老婆月餅，外酥內軟，送禮自用都咁適合。
關鍵詞
香港好去處
圖片來源：官方圖片
