黃婉曼靠女兒克服40年恐懼 自爆同老公做運動增感情保健康

試玩AI檢測驚訝數據精準 嫌自己偏肥

身為兩女之母的黃婉曼，平時既要兼顧工作又要照顧家庭，對抗衰老自然有一套。Icy在現場一口氣試用了七部AI健康檢測儀器，期間更即場拍Reels與網民分享。她笑言平時去按摩，常被按摩師傅指肌肉緊繃兼壓力大，所以今次特意來測測自己有否「內耗」：「檢測話我體重好標準，但我自己覺得標準通常都偏肥！反而係肌肉量可以再多少少。」

自爆與老公齊做「雙人運動」 拒絕節食減肥

提到保養身材的秘訣，Icy透露年輕時靠跑步、跳繩保養，但自從做媽媽之後，EQ已訓練到非常高，最重要是保持「童心」與簡單心態：「減少無謂煩惱與內耗，心態平靜，個人自然看起來年輕。」她又指生完小朋友後，曾因肌肉量不足導致腰痛及膝頭哥痛，故現在會多做Pilates（普拉提）和拉筋強化肌肉，更甜笑自爆平時會「導航」老公齊齊做Pilates，兩夫妻齊做「雙人運動」增進感情兼保健康。至於飲食方面，Icy崇尚「快樂飲食法」，絕不盲目節食：「我唔會特別節食，因為我覺得咁樣心情會好啲！心情好、身體代謝自然都會好。去完旅行食多咗，過後就食得清淡啲，最緊要唔好太強迫自己。」

40+成功學識游水 囡囡變身「魔鬼教練」

除了做普拉提和打高爾夫球，一直極度怕水的Icy，更自爆在剛過去的夏天迎來人生大突破——成功學識游水！她笑指兩位千金化身「魔鬼教練」：「我四十幾歲都唔識游水㗎！但今個夏天，我個女教識咗我！佢哋話：『唔使驚㗎，你就咁樣落水啦！』連泳圈都唔畀我。因為做媽咪喺佢哋面前唔可以話驚，所以我鼓起勇氣將個頭潛落水，點知真係浮得起！」克服恐懼後，Icy直言「成就解鎖」，感覺內在變回6歲般開心，現時最享受全家總動員一齊做運動。

記者升呢馬主夫人 去年完成中大碩士學位

黃婉曼獲封為人生勝利組，2006年畢業於中大新聞與傳播學院的她，由無綫新聞部記者做起，2009年主持《晚間天氣報告》爆紅，其後轉戰馬圈主持《放眼馬世界》結識現任丈夫馮柏基。2014年兩人在意大利舉行豪華婚禮，再於香港洲際酒店筵開50席，盛況一時。婚後升格「馬主夫人」的她未有停下腳步，除了赴日本修讀藍帶麵包課程並開設麵包店外，好學的她更於2025年完成香港中文大學佛學研究文學碩士學位，絕對是美貌與智慧並重的人生勝利組！

網民大讚黃婉曼身材澎湃完美示範健康美

黃婉曼在活動期間即場拍攝短片向粉絲分享健康心得，其性感低胸裝扮與澎湃上圍旋即引起網絡熱烈討論。大批網民湧入社交平台留言瘋狂點讚，有網民驚嘆表示「生完兩個身材依然弗到漏」、「完全睇唔出已經過咗40歲」。另外亦有粉絲對她長年保持零精神內耗感到佩服，紛紛留言請教凍齡秘訣並表示「心境開朗真係超級緊要」、「好羨慕老公可以一齊做運動」。