梅窩碼頭肥賊磨機鋸開3部單車 街坊一句話令佢即刻棄車狂奔

肥漢身穿地盤制服碼頭徘徊揀選目標

今晨9時，梅窩碼頭對開單車泊位處出現一名身穿地盤制服、絲巾包頭、身材肥胖嘅南亞裔男子。該名男子先在泊位處來回徘徊，慢慢揀選目標，期間更逐架單車按壓車胎檢查，行徑極為可疑。鎖定目標後，男子返回自己部單車，從車頭掛籃內取出一把磨機，隨即對準防盜鎖開工。磨機一開動即火花四濺、煙霧瀰漫，短短數秒已將鐵鏈鋸斷，前後共鋸開3部單車鎖頭，男子更將鋸斷殘件放入籃內，以為神不知鬼不覺。

女街坊寓所目擊即落樓聯同鄰居上前喝止

事件被附近海愉花園一名女街坊從寓所窗口全程目擊，她眼見賊人猖狂行事，即刻落樓並聯同另一名街坊上前質問。面對兩名街坊喝止，南亞裔男子竟以半鹹淡廣東話辯稱自己係「當垃圾清理」，企圖蒙混過關。女街坊不信其說辭，當場要求對方出示工作證件，男子即時支吾以對、無法回應，明顯心虛露出破綻。

賊人棄車狂奔連磨機單車都唔要

眼見謊言被拆穿，南亞裔男子隨即轉身拔腿狂奔，倉皇逃離現場。最離譜係佢連自己原本踩嚟嘅單車都唔要，遺棄喺海愉花園附近，足見當時有幾狼狽。事件中共有3部單車鎖被鋸斷，有網民將片段上載社交平台後隨即引起關注，大批街坊鬧爆梅窩治安問題，直斥賊人膽大包天、光天化日下犯案完全冇將居民放在眼內，亦有人提醒區內車主加強防盜措施以免成為下一個受害者。