香港故宮文化博物館最新駿馬公仔盲盒抽乾隆帝愛駒

Jul 6 2026

適逢香港故宮文化博物館迎來開幕四周年，館方推出咗一系列慶祝活動同全新展覽！唔單止有本地設計師操刀嘅限定紀念門票，仲有全新嘅駿馬主題展覽同超可愛嘅毛絨掛飾盲盒，即刻睇吓有咩必睇必玩亮點啦！

必睇天馬凌雲第二期全新珍品亮相

香港首個以馬為主題嘅大型中國歷代繪畫展「天馬凌雲──故宮博物院藏繪畫珍品」已經推出第二期展覽。今期一口氣展出24件全新珍品，焦點推介包括由法國傳教士畫家賀清泰同中國畫家合繪嘅《錦雲良駿圖》，畫中記錄咗乾隆帝74歲狩獵時一箭射斃雙鹿嘅吉兆；仲有國家一級文物、出自海上畫派代表人物任頤手筆嘅《霜崖眺雁圖》，以及明代畫家文伯仁營造空靈意境嘅《雪山行旅圖》。第二期展期去到9月14日，千祈唔好錯過。

乾隆愛駒化身盲盒必買超萌毛絨掛飾

香港故宮文化博物館最新推出咗文創駿馬造型毛絨掛飾盲盒，每個港幣128元。設計靈感源自乾隆帝最喜愛嘅四匹良駒赤花鷹、獅子玉、如意聰同紅玉座，當年由意大利傳教士郎世寧畫低，依家就化身成可以隨身攜帶嘅時尚毛絨掛飾。盲盒已經喺博物館禮品店獨家發售，睇吓你抽唔抽中自己心水款式啦！

探索紫禁城與世界明代陶瓷瑰寶展

除咗馬畫展，博物館仲有好多精彩展覽推陳出新。啱啱喺6月初揭幕嘅「紫禁城看世界」展覽，展示中國同亞洲其他地區及歐洲嘅文化交流，部分珍品好似國家一級文物鶴鹿同春柿蒂紋裱片，同埋畫咗河狸嘅《獸譜圖》「般第狗」冊頁，只限展出三個月至9月7日。另外，由7月1日起向公眾開放嘅「流光彰色──故宮博物院藏明代陶瓷選粹」，就會展出成化款五彩鴛鴦臥蓮圖碗同黃地青花花果紋盤等明代陶瓷傑作。