公屋住9年首遇房署入屋畫圖｜網民教「死都唔開門」結果後果曝光

房署職員突擊上門逐間房巡到廁所廚房

事件發生於6日，一名居住沙田屋邨、入住公屋長達9年的租戶在社交平台發文，表示房署職員進行突擊家訪，今次一改以往只在門口核對身份證的做法，直接要求入屋視察。職員不但巡查所有房間、廚房及廁所，更即場繪製包含傢俬擺位的全屋平面圖，並以行動裝置記錄居住情況。事主強調自己並無違規，但坦言住咗9年第一次遇到如此仔細的檢查，嚇到即刻上網發文詢難其他街坊有無同樣經歷。帖文一出，大量網民留言表示近期亦遇過同類巡查，有人指職員會用電話影晒全屋，亦有人表示家中只得一位長者在家時亦被要求入屋畫圖。

網民群起教路「企硬唔開門」質疑職員無搜查令

事件曝光後，大批網民加入討論，部分人錯誤認為租戶有絕對權利拒絕房署人員入屋，更有人言之鑿鑿留言教路：「房署職員係冇權隨便入人屋查核！佢哋有懷疑必須要向法庭申請攞到手令」，甚至有人態度強硬表示「死都唔畀入」，質疑萬一有人偽造證件圖謀不軌點算。一時之間，群組洗版式湧現大量鼓勵租戶拒絕配合的留言，氣氛一度相當熾熱，令不少街坊信以為真，以為自己真的可以企硬唔開門。

法律條文逐條KO謠言拒開門隨時被收回單位

不過，這番「霸氣」拒查言論好快就被一眾熟讀法例的網民引用條文逐一擊破。有網民直接上載《房屋條例》第22條截圖反擊，指出房署職員在執行職務時具備法定權力進入公屋單位視察，絕非「無權入屋」。更有人引用第26條警告，若房屋署署長認為租戶違反租約條款，包括拒絕讓職員入屋執行職務，有權發出「遷出通知書」直接終止租約並收回單位。此外，「屋邨管理扣分制」第19項亦明文規定租戶不得阻礙房署人員執行職務，違者將被扣分。有網民更補充，若家訪期間發現違規改建如拆除廚房防火門，租戶須限期還原，否則面臨扣分甚至罰款。大批網民睇完條文後紛紛留言力撐：「行得正企得正洗乜驚」、「租嘅就好好配合，因為好有型咁阻住人做嘢而犯法就唔好啦」，早前教人拒開門的網民即時收聲無影。