港人北上住老人院隨時被徵全球稅 項明生教一招避稅惹公審
項明生拍片教港人一招避開內地全球徵稅機制
項明生於28日發布影片，科普中國自2018年起實施嘅全球徵稅機制——任何人只要喺內地住滿183日，即成為稅務居民，海外收入都要繳稅。不過佢隨即教路，指法例設有「六年豁免權」環境，只要喺連續六年期間內，有任何一年單次離境超過30日，稅務計算就會重新歸零。項明生強調，呢30日必須係連續離境，去香港、澳門、日本都得，佢認為政策其實相對寬鬆，因為好少港人會連續六年連一個月都唔返港。此外，根據國家稅務總局2019年公告，喺境內停留不足24小時嘅當天，不計入境內居住天數，即係話好多「雙城生活」嘅港人，實際上好難累積滿 183 天。而連續居住滿六年嘅年限一律自2019年1月1日起開始計算，2018年或以前嘅年限全部清零。
網民群起質疑長者住老人院根本冇可能離境30日
事件曝光後，大批網民替北上安老嘅長者擔憂。有網民直接指出：「七老八十瞓喺老人院床上面，唔知有冇記性，有冇老人痴呆嘅情況下，要計住日數，自己某年某月某日要出境，更加要確保自己行動自如，否則出唔到境，好高難度喎。」質疑連續離境30天對行動不便嘅長者而言根本係不可能嘅任務。另一邊廂，亦有唔少網民從公民責任角度出發，認為既然選擇移居並享受當地福利，交稅係理所當然，有人直言：「有權利必有義務，享受了當地福利或政策，但又拒付應比稅項，道理真講不通！」兩派意見針鋒相對，留言區持續洗版。
長者其實毋須離境30天善用規則一樣可以避稅
不過事件出現轉折。有網民翻查政策後指出，長者其實唔一定要連續離境30天，只要喺某一個納稅年度內（1月1日至12月31日），控制喺內地居住累計不滿183天，「連續六年」嘅紀錄就會即時清零重新計算。由於「不足24小時不計一天」嘅規定，子女只需要喺某個年度內多接長者回港過週末，例如週五下午接回港、週一上午送返深圳院舍，因為呢兩日喺內地都不足24小時，唔會計入居住天數。此外，根據《內地和香港避免雙重徵稅安排》，港人喺香港已繳納嘅稅款，例如物業稅、薪俸稅等，喺內地申報時可以申請稅收抵免，扣減內地應繳稅款，避免被雙重課稅. 換言之，北上安老嘅長者只要子女配合，精明規劃居住日數，一樣可以合法避開稅網。
