連登仔票選男人7大丟架職業 網民公認「最威工種」竟然唔使返工

港男列出7大丟架職業健身教練排第一

該名港男於連登討論區發發帖，逐一列出其心目中男人最丟架嘅7大職業。排名第一位竟然係健身教練，事主直指「無業遊民先會做健教」，言論極具爭議性。其後依次為保安、拉鴨仔船、銷售員（特別點名賣衫、地產及保險從業員）、飲食業前線、賣玩具以及巴士司機，合共7個職業全部上榜。事主將多個需要體力勞動或面對客人嘅工種一網打盡，似乎認為凡係要「出力搵食」嘅男人都屬丟架之列。

網民群起公審反嘲事主貧窮限制想像

帖文曝光後，大批網民湧入留言區激烈討論，部分人直接反擊事主嘅邏輯。有人留言「要打工嘅男人」全部丟架、「不論任何車種要自己親自揸車唔請司機嘅男人」先係真正丟架，將事主嘅標準推到極致嚟諷刺。亦有網民認為保險銷售員月入十幾廿萬，質疑點解會丟架，不過承認「斷六親係真嘅」。有人提出外賣員應該上榜，隨即被其他人反駁，指外賣從業員工作辛苦值得尊重。最經典嘅留言係有網民直言「我淨係知最威係職業兒子」、「貧窮限制想像，邊個話人一定要返工」，將「唔使做」捧為男人最高境界，令成個討論區嘅風向瞬間逆轉。

內地29歲男做陪診師日入千元成新興出路

當連登仔仍然喺度爭論邊份工最丟架之際，內地卻出現一種全新職業——陪診師，又被稱為「臨時家人」。長沙29歲男子徐先生（化名）做全職陪診師，專門為獨居老人、慢性病患、行動不便者及外地就醫者提供全程陪同睇病、掛號、取藥、繳費及報告遞送等服務，同時提供心理支持。徐先生透露日薪最高可達1,000元人民幣，但坦言收入並不固定，少嘅時候只有200至300元人民幣。佢嘅團隊已由起初3人小組發展成專業團隊，徐先生更強調做陪診師唔單止睇薪水，工作後嘅獲得感先係最重要，形容自己「每天下班都很開心」。當香港網民仍然執著於邊份工丟唔丟架，人哋已經靠一份「陪人睇醫生」嘅工作搵到出路。