月入8萬港女食一餸一飯埋單218元怒斥搶錢 一句話反令自己成箭靶

一餸一飯連茶錢服務費硬食218元

事主日前帶年幼女兒到西灣河蘇豪東某餐館食晚飯，只點了一份158元鮮果咕嚕豚及一碗18元白飯，再加上每位11元茶介及加一服務費，埋單合共218元。事主事後在Facebook群組「筲箕灣西灣河關注組」發帖大呻，直斥「咁樣收我$218真係唔好去搶」，又批評咕嚕肉味道偏酸、份量極少，認為食物質素與價錢完全不成正比。她更表明收呢個價錢「起碼都應該包碗白飯同茶水」，揚言對該餐館「無下次」。

網民群起公審意見兩極有人反轟事主

事件曝光後，大批網民替事主不值，有人鬧爆餐館定價離地，「160蚊俾啲咁嘅嘢，又真係過份處理」、「份量好少」、「兩餸飯$40有找，可能仲多啲飯」。不過亦有大量網民反轟事主，認為餐館明碼實價，入座前理應睇清楚收費，「冇人逼你一定要喺嗰到食喎，事後投訴貴有啲匪夷所思」、「點餐時看見價錢可以走㗎」。更有人直指睇到餐館地段同門面，「預咗唔係茶餐廳價錢啦」，質疑事主自己揀錯食肆卻怪人。

事主自爆月入8萬反成箭靶惹嘲諷

本來網民對餐廳收費是否合理各持己見， but事主一句「我月入8萬以上」反令風向急轉。她豪言「我畀得起，但係唔代表啲錢咁樣使係值得」，又稱若非女兒要考試，「個個禮拜六日想北上消費，使乜留喺香港食啲咁嘅垃圾」。此番言論令不少網民反感，有人揶揄「太過份，一定係佢搵支槍指住你入去食」，亦有人諷刺事主既然自認中產，去高級餐廳食飯卻嫌貴實在矛盾，「貴從來都不是餐廳的問題，是閣下的問題」。一場投訴帖最終變成事主被公審，成為群組熱話。